هاني شاكر لـ ساويرس: لا أقبل التهديد أو التطاول.. وأنا معلقتش على مهرجان الجونة
هاجم الفنان هاني شاكر، نقيب الموسيقيين، تصريحات المهندس نجيب ساويرس؛ التي انتقد خلالها قرارات نقابة الموسيقيين بوقف عدد من مطربي المهرجانات عن الغناء.
وقال شاكر في مداخلة هاتفية مع الإعلامي عمرو أديب، ببرنامج الحكاية، المُذاع عبر فضائية mbc مصر، مساء الجمعة: لا أقبل لغة التهديد أو التطاول من أي حد كبير أو صغير، أنا معلقتش على مهرجان اللجنة بالرغم من اللي اتعمل فيه، محدش اتكلم على المهرجان وأنا نفسي سكت ومتكلمتش.
وأضاف نقيب الموسيقيين: لم أتجنى على أحد، وأنا هنفسن من مين؟، هنفسن من حنجرة وكسبرة؟، هو أي تلاقيح على الناس وخلاص، وأنا لا أقبل هذا الكلام، واللي ملوش في حاجة ميعلقش عليها.
وتابع الفنان هاني شاكر: النقابات معمولة عشان نطبطب وندادي على الأعضاء، مصر فين من ده كله، هي الجمهورية الجديدة مش من حقنا الدفاع عنها ونخاف عليها.
واختتم نقيب الموسيقيين: إحنا كنقابة ملناش سلطة على اليوتيوب ومواقع التواصل في عرض تلك النوعية من الأغاني، ولكن الخروج على المسرح أو الاشتراك في فيلم ده من صميم حقنا كنقابة مهنية، وكل الأسماء اللي تم منعها ليسوا أعضاء نقابة، وإحنا لا منعنا ولا سمحنا ولكن دور النقابة أننا نحافظ على المهنة.
