بعد شريف إدريس.. محمود عامر يشكو من سوء التعامل معه: شغلانتنا بقت مدمرة
أعرب الفنان محمود عامر عن استيائه الكبير من سوء التعامل معه، خاصة بعد قبوله المشاركة في عمل فني، ثم تفاجئه برسالة من المسؤول عن العمل يعتذر فيها له عن مشاركته معهم، مؤكدًا أن العمل بالوسط الفني أصبح صعبًا للغاية، وأن المهنة أصبحت مدمرة نفسيًا وعصبيًا.
وكتب محمود عامر منشورًا، عبر حسابه الشخصي بموقع التواصل الاجتماعي فيسبوك، قائلًا: مش هقول أني فنان محصلتش، وأني معرفش إيه ولا المفروض معرفش أكون في مكان إيه، أبدًا، كل الحكاية ببساطة إن أنا فنان ودي شغلتي ومهنتي وعمري كله، وحياتي كفنان فيها إخفاقات، وإحباطات ونجاحات، وربنا هو وحده مقسم الأرزاق.
أزمة محمود عامر
وتابع محمود عامر: لكن في ناس مصرين على التعامل بشكل غير مرضي، ومؤذي نفسيًا مع الفنانين، والواحد مبيتعلمش للأسف الشديد، الحكاية أنهم كلموني في مكان ما، على شغل، واللي كلمني قالي معلش المخرج عاوز يشوفك، لأنه مش عارفك كويس، قلت له يدخل على النت ويكتب اسمى ويشوف ويعرفني.
وأضاف محمود عامر: قالي معلش حضرتك، عاوز يشوفك شخصيًا، لأنه محتاجك في حاجة معينة، حاضر تمام رحت، وقدمت المطلوب، وقابلت المساعد الأول والمخرج مجاش، يومين واتصلوا وقالولي من فضلك ابعتلنا مقاساتك في اللبس وخلافه، وإن شاء الله التصوير يوم الجمعة لو ظروفك سامحة، تمام سامحة إن شاء الله، لغاية الخميس بالليل لاحس ولا خبر، سألت إيه الحكاية يا جماعة، قالولي معلش يا أستاذ المعاد بقا يوم السبت، فاضي إن شاء الله؟
محمود عامر: شغلتنا مدمرة نفسيًا وعصبيًا
واستكمل محمود عامر: تمالكت أعصابي وقلت إن شاء الله فاضي ماشي، الجمعة بالليل كتبولي على الواتس، معلش يا أستاذ محصلش نصيب، الكلاينت معرفش إيه وبنعتذرلك، وإحنا كمان بنعتذرلك.. ده بقا اسمه إيه؟
واختتم محمود عامر: عارف أنه مش رزقي، وعارف أنه كله نصيب، لكن الواحد يقول إيه في الموقف ده، فعلا شغلتنا دي مدمرة نفسيًا وعصبيًا، وملهاش أي كتالوج، لكن برغم كل ده لسه عندي طاقه أقدر أقول إن بكرة أحلى.
ويأتي ذلك بعد الأزمة الأخيرة للفنان شريف إدريس، الذي اشتكى أيضًا من سوء التعامل معه في الوسط الفني، من قبل بعض المسئولين عن الأعمال الفنية.
