صاحب سيلفي محمد صلاح يكشف كواليس التقاطه الصورة مع الفرعون المصري
انتشرت خلال الساعات الماضية عبر منصات التواصل الاجتماعي، صورة لشاب مصري داخل المواصلات العامة، تجمعه بـ محمد صلاح، لاعب المنتخب المصري، ونادي ليفربول الإنجليزي.
كواليس التقاط الصورة
في هذا السياق، كشف أحمد محمود صاحب الصورة السيلفي مع محمد صلاح، لـ القاهرة 24، كواليس التقاطها.
وقال محمود: أنا بشتغل محاسب في إحدى الشركات التابعة لوزارة الطيران المدني، وأنا مروح من الشغل، في حدود الساعة 4.30 مساءً، كنت ما بين نادي السكة وميدان الشهيد هشم بركات، الميكروباص وقف، لاقيت محمد صلاح في العربية على شمالي.
وأضاف محمود: رفعت الموبيل اتصور معاه لقيته بصلي، واتصورت معاه، بعد كده حاولت أخد صورة تاني، لقيته بيتحرك معايا، وعرفت أنه بيستجيب ليا وللصورة يعني.
وأوضح صاحب الصورة: بعد كده نزلت الصورة على ستوري فيسبوك، لقيت حد من الأصدقاء اللي عندي، قالي أنا هستخدم الصورة، وبعد كده لقيت الناس كلها بتتكلم عن الموضوع ده.
وعن شعور الركاب بصورته مع محمد صلاح، قال محمود: أنا كنت مبسوط جدًا بالصورة، وكل اللي راكبين معايا كانوا فرحانين بصلاح.
التقاط الصورة لا يتعدى ثوانٍ
وأكد محمود أن التقاط الصورة مع صلاح، لا يتعدى ثوانٍ معدودة، ومكنتش متخيل رد الفعل الكبير عليها، مشددًا: أنا عمري ما قابلته، ودي أول مرة أشوفه، لكن طبعًا بشجعه.
وفي وقت سابق، التقط صلاح صورة أخرى، مع ملكة جمال مصر، سونيا جرجس، بإحدى الشواطئ في دبي.
وسرعان ما انتشرت الصورة عبر مواقع التواصل الاجتماعي، وتواصل أيضًا موقع القاهرة 24 مع سونيا، التي أكدت أنها التقطت الصورة، خلال تواجد صلاح بالشاطئ الذي تعمل به، خلال قضاءه عطلة لمدة يوم واحد، برفقة أصدقاءه.
