أحمد فهمي: نادي بيراميدز استثمار غير ناجح وكيان مش مهم ولم يضف شيئا للكرة المصرية
عبّر الفنان أحمد فهمي عن رأيه في نادي بيراميدز، مشيرًا إلى أنه نادٍ لم يضف أي شيء للكرة المصرية سوى الاحتقان، بالإضافة إلى توجهيه رسالة إلى مشجعي نادي الزمالك.
وقال أحمد فهمي خلال ندوة تكريمه بـ القاهرة 24: فيه أندية مش بحبها زي بيراميدز رغم إن لاعيبة بيراميدز نصهم أصحابي ولكن مش شايفه استثمار ناجح ولا شايفه كيان مهم ولا شايفه أضاف أي حاجة للكرة المصرية غير احتقان.. دي وجهة نظري.. أقدر أقول الكلام ده على الزمالك؟ لا.
أحمد فهمي: نادي بيراميدز معملش حاجة بالمليارات اللي عنده
وأضاف: مش عشان قدام كاميرا أنا عملت خناقات أكبر من كده.. الزمالك نادي أضاف للكرة المصرية كتير.. نادي في أفريقيا له صولات وجولات.. ولما أكسبك ما أكيد هحفل عليك لأنك أهلاوي وأنا زملكاوي.. وبنضحك كلنا وفي الآخر الدنيا لطيفة.. لكن نادي من الأول مسبب احتقان.. يعني لما تيجي تشوف مسيرة فيوتشر هو نادي أخد بطولة وتاني دوري وفرقة ماشية بشكل كويس أوي.. لكن أنت مثلًا عندك مليارات ومعملتوش حاجة في حين إن حرس الحدود وإنبي وطلائع الجيش خدوا بطولات بأقل من 10 % من الإمكانيات دي.
واختتم حديثه قائلًا: فأنا لما باجي أتكلم في موضوع بيراميدز بتكلم فيه بجد.. ولكن لو اتكلمت في حاجة زي دي على الزمالك فـ ده أكيد هزار لأن الزمالك تاريخ كبير.. بس هفضل أهزر وأنتو هتفضلوا تهزروا علينا عادي يعني.
