المتهم بقتل جاره أثناء لم عزاله بكورنيش النيل: فتح أنبوبة وكان عايز يولع فينا ولما حاولنا نوقفه اتعور وبعدها مات| تحقيقات
خلافات سيدات ظلت أكثر من شهرين كانت نهايتها مقتل شخص على يد جاره بسبب لعب الأطفال؛ لينهال المتهم على المجني عليه أثناء مغادرته الشقة ورفع عزاله بسلاح أبيض على إثره سقط جثة هامدة.
المتهم بقتل جاره أثناء لم عزاله بكورنيش النيل
وأمام جهات التحقيق وقف المتهم س.م يروي تفاصيل الجريمة التي حملت رقم 4540 لسنة 2023 جنح الوراق قائلا: اللي حصل إني من حوالي شهرين كان فيه خلافات على الجيرة بيني وبين كريم بسبب لعب العيال، ومراتي رقية اتخانقت مع مراته قبل كده وفضلت المشاكل دي موجودة.
وتابع المتهم في التحقيقات: الحريم كانوا بيتخانقوا كل أسبوع تقريبا، وامبارح روحت البيت فطرت ونزلت من البيت على الساعة 7:30 بالليل عشان أروح أزور والدتي، وبعدها بحوالي ساعة مراتي رنت عليا وقالتلي إن كريم وأحمد نزلولها البيت وشتموها، وكانوا عايزين يضربوها.
وأكمل المتهم: أنا روحت بسرعة وقابلت مصطفى في الطريق وحكيت له اللي حصل، وقالي أنا جاي معاك، ولما وصلنا البيت طلعتلهم الشقة بس ملقتش حد فيهم وفضلنا قاعدين شوية، لقيت أحمد وكريم بيخبطوا على الباب وبيتخانقوا معايا والناس فضت المشكلة، ومراتي نزلت راحت عند بيت أبوها.
وأضاف المتهم: بعدها لقيت خبط جامد على الباب، ولما فتحت لقيت أحمد ماسك أنبوبة وسكينة وفتح الأنبوبة ناحية البيت وكان بيطلع ولاعة من جيبه، فأنا أخذت منه الأنبوبة بسرعة وقفلتها، وأنا ومصطفى مسكنا في أحمد وحاولنا إننا نوقفه وفجأة لقيناه اتعور في رجله اليمين، وبعدها كريم نزل وكان معاه کرسي خشب وضرب مصطفى في دماغه عوره، فدخلت البيت أنا ومصطفى وقفلنا علينا الباب لحد ما الحكومة جات وأخذونب على القسم، وساعتها عرفت إن أحمد مات وهو ده كل اللي حصل.
