داعية إسلامي: يجوز عمل الرجل والمرأة داخل مكتب منفردين في هذه الحالة
قال الداعية الإسلامي الدكتور أسامة قابيل، من علماء الأزهر الشريف، إن هناك أخلاقيات في العمل بين جميع الزملاء، لافتا إلى أن العلاقة بين زملاء وزميلات العمل قائمة على طاعة الله ومراقبة الله لنا في كل تصرفاتنا.
هل يجوز عمل زميل وزميلة داخل مكتب واحد؟
وتابع الداعية الإسلامي، في تصريحات تلفزيونية، اليوم الاثنين: يجوز عمل زميل وزميلة داخل مكتب منفردين بشرط أن يكون مفتوحا، أمام الناس كلها ويدخل ويخرج عليه زملاء، حتى لا يكون إطار خلوة شرعية ولازم نغلق كل أبواب دخول الشيطان، كل بنت لازم تعرف إن زميلها في الشغل ده أجنبي عنها لازم تحترمي إطار الأسرة سواء والدين أو زوج؛ لأنهم وثقوا فيها وسمحوا لها إنها تنزل تشتغل لتحقق ذاتها وكينونتها.
وأضاف الداعية الإسلامي: كمان لازم احترام الخصوصية وفق القواعد العائلية يعني في مواعيد يكلمها فيها زميلها في الشغل لو في أمر هام ومصالح العمل متعطلة على ردها، يعنى لو هي متزوجة وزميلها بيكلمها الساعة 11 و12 بالليل عشان أمر مهم في الشغل ممكن تحصل مشكلة، وزوجها يقولها بتكلمي مين وليه وعشان إيه، في ممكن حل تاني يبعت إيميل أو واتساب أو أي وسيلة بدون كلام، والزميلة ترد على العمل وكل ده يكون في إطار قواعد العمل الأخلاقية، وطبقا للقواعد العائلية يعني في سيدات ترفض إن حد يكلمها بعد 10 مساء، وكذلك بعض الرجال واضعين قواعد صارمة، لهذا عشان زوجاتهم، يبقى ما دام هناك اتفاق ورضاء عائلي فلا مانع ما دام وفق القواعد الأخلاقية ومراقبة الله في كل تصرفاتنا.
واستكمل الداعية الإسلامي: لو أنتي أو أنت داخل وظيفة جديدة في الشغل لازم الأول تسمع وتتفرج وبعدين أتكلم، شوف الشغل ماشي إزاي والناس بتنجح الشغل والملفات دي إزاي، وإزاي في تعاون جماعي.
