نجل شقيق العندليب: أهديت محمد رمضان كرفتة من ريحة عبد الحليم حافظ لأنه ممثل قوي|خاص
كشف محمد شبانة ابن شقيق الفنان الراحل عبد الحليم حافظ تفاصيل مقابلته مع الفنان محمد رمضان، وأنه أهداه كرفته من كرفتات العندليب الأسمر.
وقال محمد شبانة في تصريح خاص لـ القاهرة 24: أهديت محمد رمضان كرفتة من كرفتات عبد الحليم حافظ بعد مسلسل ابن حلال؛ لأنه قدم الدور حلو جدًا وهو ممثل قوي وأنا بعتز بصداقته.
وأضاف شبانة: ومحمد رمضان كان سعيدا جدًا وقتها، واتكلم عن الموضوع ده في أحد البرامج التليفزيونية، وحبيت أني أهديه كرفتة من ريحة عبد الحليم حافظ.
محمد شبانة: بنفكر نعمل متحف لعبد الحليم حافظ
وفي سياق آخر، تحدث محمد شبانة في لقاء سابق لـ القاهرة 24 عن فكرة إقامة متحف لمقتنيات عبد الحليم حافظ، قائلًا: بنفكر نعمل متحف لعبد الحليم، ولكن مينفعش في شقة الزمالك لأنها جوا عمارة، وإحنا عايزين حاجة تبقى مفتوحة 12 ساعة، وبنشوف بعض الجهات علشان المتحف.
واستكمل شبانة حديثه: إرث عبد الحليم نفسه، راح للمستفيدين اللي بعد وفاة عبد الحليم سيطروا على الصوتيات، مكنش عنده أملاك وكنا عايشين في حاجات إيجار وحاجات بسيطة.
أما عن الخطوط الحمراء في حياة العندليب الراحل، فعلق محمد شبانة قائلًا: حد الله ورسوله الخطوط الحمراء في حياة عبد الحليم حافظ، كان بيتقي الله ورسوله، كان سمعة ونضافة واسمه يعيش لحد دلوقتي.
