ميدو ينتقد ثلاثي الزمالك.. وعن فتوح: افتكر نفسه روبرتو كارلوس
انتقد أحمد حسام ميدو، نجم الكرة المصرية السابق، تصرف أحمد فتوح ومحمد صبحي ومصطفى الزناري ثلاثي الزمالك، بعد مغادرتهم معسكر الفريق لمباراة زد في الدوري الممتاز.
تصريحات أحمد حسام ميدو
وقال ميدو في تصريحات تلفزيونية: أنا كنت فاكر نفسي فاجر، لكن لما سمعت قصة فتوح والزناري ومحمد صبحي اكتشفت إن لا أنا مش فاجر، أنا معملتش كدة في معسكر أي ماتش، ولا عملت كدة بالبجاحة والفُجر ده، وشابو مجلس حسين لبيب، وكل الزملكاوية النهاردة فرحانين بالقرارات دي.
وهاجم أحمد حسام ميدو، أحمد فتوح ظهير أيسر الزمالك، والذي تم عرضه للبيع من جانب مجلس إدارة نادي الزمالك، قائلًا: أحمد فتوح ده مرة وقف في وسط أوضة لبس الزمالك، واعترف وقال اعتراف معين، ووقتها مرتضى منصور فضحه، واللاعب لازم يعرف إنه لاعب مش أكبر من المكان، مفيش لاعب أكبر من الزمالك واسمه.
وانتقد ميدو تصرف أحمد فتوح، قائلًا: فتوح افتكر نفسه روبرتو كارلوس، في عقليات متستحملش النجومية ولا تستحمل الكلام ده، وزيزو عشان عقليته كويسة الفلوس اللي بياخدها مأثرتش فيه بالعكس بيشتغل على نفسه أكتر.
وأضاف أحمد حسام ميدو: شيكابالا سنين طويلة مبياخدش مستحقات، مبيتكلمش، اللاعيبة دي نموذج وتستحق إنها تكمل بعد الاعتزال، ومحمد عبد الشافي، هل فتوح أجمد من عبد الشافي؟ فتوح لاعب كورة كويس لكن عبد الشافي لا يُقارن بأحد وكان لاعيب كورة جامد جدا وأجمد من فتوح.
وتحدث ميدو عن كواليس ما حدث في المعسكر قائلًا: عمر جابر ودونجا كانا في عيادة معسكر مباراة الزمالك وزد، شاف الثلاثي لابسين لبس خروج وماشيين، عمر نادى شيكابالا، شيكا قالهم إنتوا رايحين فين، التلاتة قالوا هنجيب حاجة وراجعين، شيكابالا كقائد مكانش عايز الموضوع يكبر لكن كان هيتجنن.
وأكمل ميدو: فات نص ساعة، شيكابالا كلم صبحي والزناري قالهم ارجعوا الكلام ده ميصحش، شيكا كان بيلم الدنيا وده دور القائد قبل ما الموضوع يكبر، وبعد شوية صبحي والزناري رجعوا، وشيكابالا كان بلغ أعضاء الجهاز الفني.
وواصل ميدو سرد التفاصيل: تخيل الزمالك عنده ماتش تاني يوم واللاعيبة كلها صاحية الساعة 4 الفجر، وفي أزمة في المعسكر بسبب خروج الثلاثي، شيكابالا قال فتوح ارجع عندنا ماتش بكرة، فتوح قاله: انتوا عايزين مني إيه، أنا بقولك أنا مش هرجع غير لما اخلص سهرتي، وهرجع الفجر، وهنا عبد الواحد السيد بلغ شيكابالا قاله قول فتوح ميرجعش.
ووجه أحمد حسام ميدو تحية خاصة لـ عبد الواحد السيد، مدير الكرة بنادي الزمالك، مؤكدًا أنه كادر محترم ويستحق المساندة، وأنه تعامل مع الأزمة بشكل رائع، ويستحق بالفعل مساندة جماهير الزمالك.
