المرأة الحديدية صيصة: محتاجة أتعالج ومش معايا فلوس وهروح انتخب الرئيس السيسي بعكاز
لقبها العديدين في محافظة الأقصر بالمرأة الحديدية، وكرمها الرئيس السيسي بل وكانت قصتها ملهمة للعديد من الأعمال الدرامية، فهي الحاجة صيصة أبو دوح والتي قاربت الـ 60 عاما وقضت عمرها مرتدية ملابس الرجال وتقوم بأعمالهم الشاقة حتى أنها عملت في مهنة المعمار حاملة الرمل والطوب والزلط بعد وفاة زوجها من أجل أن تربي ابنتها بعفة وشرف دون أن يضايقها أو ابنتها أحد.
تعبانة ومش معايا حق العلاج
وقالت صيصة لـ القاهرة 24: أنا تعبانة ركبي ما بقتش شيلاني، ووقعت كذا مرة على السلم، وعيني من ساعة ما دخلت فيها نحلة ومبقتش بشوف منها كويس وبتألمني.
و أضافت صيصة: محتاجة أتعالج والدكاترة والعلاج بيتطلبوا فلوس كتيرة وأنا على فيض الكريم مش معايا ولا مليم، وياريت حد يساعدني.
هروح انتخب الرئيس السيسي حتى لو على عكاز
و قالت صيصة: بالرغم من تعبي ده ووجع رجلي اللي مش قادرة أدوس عليها إلا إني هروح لجنة الانتخابات علشان انتخب الرئيس السيسي حتى لو روحت على عكاز علشان بحبة، وربنا ينصره ويقوية أكيد مش بينام علشان يحافظ على البلد.
فطرت جنب الرئيس في رمضان وكنت مكسوفة مش عارفه أكل بالشوكة والسكينة
وأضافت صيصة: رمضان الماضي عزمنا الرئيس على الفطار في فندق الماسة وكنت داخلة مع الستات اقعد لقيت الحرس بيقولي تعالي مكانك جمب الرئيس وقعدت جنيه وأنا مكسوفة مكنتش عارفه أكل بالشوكة والسكينة وكنت باكل بايدي، وهو شخص مهذب جدا وراقي.
و واصلت صيصة: الشقة اللي أنا فيها دي مش بيتي، ده بيت الرئيس هو اللي أمر بية ليا، ربنا يستره، ونفسي أشوفة تانى وأسلم علية وحشنى.
