البطل عايز يتخفّى.. مصممة أزياء فيلم شماريخ: شخصية بارود مش لايق عليها الألوان الفاتحة| صور
تحدثت غدير خالد مصممة الأزياء بفيلم شماريخ، بطولة الفنان آسر ياسين عن أزياء العمل، وعن تحضيرها لأزياء شخصية بارود في الفيلم.
وقالت غدير خالد في تصريحات خاصة لـ القاهرة 24: مكنتش حاسة إن الفيلم تبقى ألوانه مبهجة أو في الفواتح، ده اللي بتفرضه عليا الشخصيات.. شخصية رؤوف ـ آسر ياسين- هو في الضل وبيمر على حاجات كتير وبيعمل عمليات كتير.
وأضافت غدير: هو عمره ما هيروح للألوان الفاتحة هو عايز يبقى متخفي دايما ومش عايز الناس تلاحظه أو تاخد بالها أنه موجود.. دايما بيلجأ للألوان زي الرمادي والأسود اللي هي مش بتشد العين عشان مش عايز يبقى ملحوظ.. هو متداري.
وواصلت: شخصية بارود رؤوف عايشة في الظل، دايما مش عايز يتم ملاحظته أو يبان.. وأي شخصية كدة دايما مفيش تفاصيل ملفته في ملابسه ودا جزء من ذكائه.. ودا اللي حاولت أعبر عنه سواء من خلال الخامات أو الألوان.. وفي خلال رحلته في الفيلم شوفنا الشخصية في التدرج اللوني من الأسود لحد أفتح درجات الرمادي مع اللون الأخضر في النهاية.. وكل درجة لون من الألوان دي عبرت بيها عن مرحلة في الشخصية.. كمان اكسسوارات الشخصية كانت ليها علاقة بطبيعة عمله في ورشة بمب وشماريخ.
واستكملت غدير حديثها قائلة: على مدار الفيلم شخصية بارود بدأنا باللون الأسود وبعدين رمادي، وبعدين الرمادي الأفتح.. ووصلنا في نهاية الفيلم للأخضر على مدار رحلة التطهر من الأسود أوي والغضب اللي جواه فبيفتح واحدة واحدة.
فيلم شماريخ
يضم فيلم شماريخ عدد كبير من النجوم أبرزهم: آسر ياسين، أمينة خليل، خالد الصاوي، آدم الشرقاوي، وعدد آخر من الفنانين، والعمل من تأليف وإخراج عمرو سلامة.
