والد المشجع إسلام زكي في ذكرى وفاته: قبل ما يروح الماتش قالي متخافش يا بابا.. وبنحتسبه شهيد عند ربنا| بث مباشر

اجتمع جماهير نادي الاتحاد السكندري، مساء اليوم أسفل منزل إسلام زكي مشجع نادي الاتحاد السكندري المتوفي العام الماضي، وذلك لإحياء ذكرى وفاته.

جماهير الاتحاد تحي ذكرى وفاة إسلام مشجع الاتحاد السكندري 

وقال والد إسلام زكي مشجع نادي الاتحاد السكندري: إحنا مسلمين وموحدين بالله.. وده كان عمره.. وإحنا بنحتسبه شهيد عند ربنا.. وربنا يرحمه ويسامحه.

وأضاف والد إسلام مشجع الاتحاد السكندري: حب الناس لإسلام ظهر بعد وفاته وكل الناس بتحبه والشباب كلهم إخواته وحبايبه.. والكل بيدعيله في كل وقت، وحب الناس ليه وسيرته الحلوة اللي بتصبرني على فراقه، وبشكر إدارة النادي الأهلي والكابتن محمود الخطيب لأنه مسبناش هو وناس كتير تاني بشكرهم كلهم.

وأكد والد المشجع إسلام زكي: وقفة كل الناس جمبي وحبهم لـ ابني خلتني أتراجع عن فكرة أني أرفع قضية بالإهمال اللي حصل لابني، وربنا يصبرنا على فراقه.

واستكمل والد المشجع إسلام: كان بيحب يروح يحضر مبارايات الكورة مع أصحابه مع أنه مكنش بيلعب كورة كتير وكان لعبه بسيط، ولكن أصحابه كانوا بيحبوه وكانوا بياخدوه معاهم، وفي الأول وفي الأخر دة قدر ربنا وكان هينفذ لا مفر.. وقبل ما يروح الماتش قالي متخافش يا بابا أنا رايح مع أصحابي ومعانا ناس كتير.

وكان توفي إسلام زكي مشجع نادي الاتحاد السكندري، إثر أصابته في أحداث صالة حسن مصطفى في شهر ديسمبر الماضي أثناء تواجده في مباراة فريقه أمام الأهلي في نهائي كأس السوبر المصري لكرة السلة.