أحمد سعد: كنت بحب دايما أظهر في العيلة وده مرض.. وحفظت قرآن من طفولتي
كشف الفنان أحمد سعد عن طفولته وعلاقته بـ أشقائه، بالإضافة إلى الحديث عن النجاح الذي حققه خلال السنوات الماضية وتأثير الجمهور بـ أغنية إيه اليوم الحلو ده.
وقال أحمد سعد في تصريحات تليفزيونية: بقالي 3 سنين بنجح نجاح كبير عليا جدًا.. وكل سنة بيحصل ليا حاجة غريبة الناس بتقولي السنة دي سنتك فبخاف فـ بجتهد أكتر.
وأضاف سعد: النجاح بالنسبالي أن كل الناس في الحياة يلقوا عندك حاجة يحبوها ليك سواء بقى طريقتك أو خفة دمك، والناس بتسمع أغنية إيه اليوم الحلو ده في شوارع باريس والفقراء والأغنياء وبتعمل أجواء حلوة ليهم.
أحمد سعد: مبحبش أبان طيب وغلبان.. وفي علاقة روحانية بيني وبين نفسي
وعن أقرب الأغاني له والتي تعبر عن شخصيته، أوضح سعد: كنت عامل أغنيتين سألت نفسي كتير من أكتر الأغاني اللي بتعبر عني وأغنية أنا إنسان، وبحس إني ببان على شكل وأنا من جوا شكل تاني خالص والصراع بين الخير والشر هو ده أنا.
واستكمل سعد حديثه: حاسس إني أنا طيب وغلبان ومبحبش أبان طيب وغلبان.. بس أنا كده مع نفسي بيصعب عليا نفسي والناس وفي علاقة روحانية بيني وبين نفسي.. وبحب أبين للناس إني الجامد والقوي وأصيع واحد في الكوكب، والبني آدم عايز يوري حاجة عكس اللي جواه وفطرتي فيها حاجات تتداس.
واختتم أحمد سعد حديثه: ابتديت أحفظ قرآن وابتهالات دينية في طفولتي وبعدين دخلت في أم كلثوم وعبد الوهاب، وكنت دايما في العيلة بحب أظهر عشان كنا 9 وحب الظهور ده نوع من أنواع الأمراض كنت بحارب طول الأسبوع عشان أبان قدامهم.
