مترجم كولر عن أزمة جماهير الأهلي: المدرب زعل.. واللاعبين سألوا مش بيشجعونا ليه؟
وجه خالد الجوادي مترجم السويسري مارسيل كولر مدرب الأهلي، رسالة إلى جماهير القلعة الحمراء، بعد التتويج بلقب كأس مصر على حساب نادي الزمالك.
رسالة مترجم كولر لجماهير الأهلي
كتب الجوادي عبر حسابه الشخصي على فيسبوك: الحمد لله فرحة كبيرة أوي، وكما اعتاد أصدقائي شوية خواطر كده.
وتابع: الماتش ده والكأس ده سيبقى من أيام الأهلي الكبيرة التاريخية، وفرحة كبيرة وإشارات عجيبة، سيناريو ما قبل الماتش من أول قرار لعب المباراة في السعودية مرورًا بأحداث ليلة المباراة، اللي خلت أغلب الأهلاوية يدب في قلوبها الحزن والتشاؤم، ثم موضوع الجمهور، وبعدين أحداث وسيناريو المباراة نفسها، وختام دراماتيكي أعنف من الأساطير الإغريقية سواء توقيت الأهداف ومحرزيها وجمالها.
وواصل: سيناريو أسطوري خلى الفرحة فعلا عارمة، لو قبل الماتش بأسبوع حد قالك الأهلي هيكسب 2-0 هتقول عادي ونتيجة مش قد كده، لكن ربنا أراد لنا وكاتب لنا فرحة كبيرة من القلب فكان هذا السيناريو العجيب، نحمدك ونشكرك يا رب على هذا السيناريو وهذه الفرحة الكبيرة الحمد لله.
وأكمل مترجم كولر تصريحاته: نقطة خايف تتسبب في هجوم عليّ، بس أنا في الأول والأخر مشجع درجة تالتة قبل أي حاجة وللأسف اتعودت من حياتي في ألمانيا على حرية الرأي، وإن أي موضوع قابل للنقاش والاختلاف الصحي المحترم، وأقسم بالله لا بنظر على حد ولا شايف نفسي محتكر.
وأوضح: إمبارح جمهور الأهلي في الاستاد قاطع التشجيع من قبل المباراة، وتقريبا طول الماتش مقاطعة حقيقية مؤلمة من وجهة نظري، وزعلت كولر جدا، وعارف إن الجمهور كان زعلان من منع دخول أدواته والدخلة والأعلام، وطبعا حقه يزعل وخصوصًا إن المنافس تم السماح له بكل شيء.
وواصل الجوادي: لكن، هل أضر فرقتي اللي بشجعها عشان منع الأدوات؟ مش إحنا على الحلوة والمرة معاه؟ مش اتعلمنا مع الأهلي نقاتل في ظل كل الظروف وأي ظلم؟ وعلى فكرة أشهد الله أن الإدارة بذلت جهد خارق ومحاولات مستميتة أشهد عليها لمساندة الجمهور في كل طلباته، بس بجد مش كل حاجة في إيدك، في التسخين اللاعيبة عماله تسأل الجمهور ماله؟ الجمهور مش بيشجعنا ليه؟ والجهاز كله عمال يؤازر اللاعيبة ويقولهم ركز ركز مالكش دعوه بحاجة، بس اللاعيبة كانت فعلا مشتتة بسبب الموضوع لأنه كان غريب جدا وموجع لنا.
وأكمل: هل قرار الجمهور بمقاطعة التشجيع وترك الساحة لجمهور المنافس طول الماتش كان صح؟ هل الجمهور بيروح الإستاد يشجع الفريق ولا يشجع نفسه والأدوات؟، مش عارف؟ يمكن أنا غلط ومش بنظر على حد أتا مكنتش في مكانهـ لكنه سؤال وموقف للمناقشة، بس انا كنت زعلان أوي لأننا كنا محتاجين الجمهور أوي، جمهور الأهلي العظيم اللاعب رقم 1، أعظم جمهور في الكون كان الحاضر الغائب.
وشدد: من قبل الماتش كنت بقول لكولر ده ماتش الموسم، أنا مش عايز حاجة من الموسم غير الماتش ده، بعد الماتش بـ3 ساعات بقوله بجد يا كوتش مش عايز غير إفريقيا والدوري ويبقى الموسم كده الحمد لله، قالي مفيش فايدة فيك مش كنت يا ابني بتقولي ده ماتش الموسم، قلت له يا كوتش ده الكلام قبل الماتش بعد الماتش خلاص، إحنا الأهلاوية ما بنشبعش.
واختتم مترجم كولر: ربنا عالم بتعبنا وإخلاصنا للكيان، يا رب دايما من نصر لنصر وفرحة لفرحة وبطولات لا تنتهي.
