ولد ضربني وأبوه أطلق نار.. أقوال الطفل المجني عليه بمشاجرة مدرسة منهاتن الدولية بالبساتين | خاص
يستكمل القاهرة 24 نشر التحقيقات في القضية رقم 7604 لسنة 2024 جنح البساتين بواقعة مشاجرة مدرسة منهاتن بالبساتين، عن إطلاق والد أحد الطلاب 3 طلقات، ما أثار الرعب والذعر في نفوس الأهالي والطلاب في الواقعة.
مشاجرة مدرسة منهاتن الدولية بالبساتين
وقال الطفل ياسين الحسين، الطالب بمدرسة منهاتن الدولية بالبساتين أمام جهات التحقيق: أنا الطفل اللي انضربت وعندي 14 سنة و10 شهور، اللي حصل إنه كان في جروب سناب شات فيه شلة المدرسة، وحصلت مشكلة وناس شتموا في الشات، وبعدها قلبت بخناقة وقالوا إن هما هييجوا يضربونا عند قسم الأميريكان، بعدها وأنا خارج من باب القسم رايح أركب مع السواق اللي بيوصلني كل يوم، لقيت م. م وابنه ياسين واتنين كمان ضربوني ووقعوني على الأرض.
وأضاف المجني عليه بواقعة مشاجرة مدرسة منهاتن بالبساتين: فضلوا يضربوني وياسين كان عمال يضرب فيا بالبواني والشلاليت وأبوه م. م كان عمال برضه يضرب فيا بالبواني ووقعوني على الأرض وكان في واحد اسمه ا. ج كان ماسك كزلك وضربني بعدها الراجل اللي اسمه م. م وبعدها قعد يزعق.
وأوضح الطفل ياسين الحسين، الطالب بمدرسة منهاتن الدولية بالبساتين أمام جهات التحقيق: بعدها خلى أ. ج اللي كان لابس تيشيرت ملون يمسكني من رقبتي تاني، وكان معاه الكزلك في إيده وبعدها الناس جت عشان تحوش وبعدونا عن بعض وبعدها المدرسة دخلتني جوة وأنا كلمت بابا عشان ييجي وبعدها م. م كان عاوز يدخل يضربني تاني بس الناس اتلمت عليه في الشارع برة فراح مطلع مسدس أسود ضرب بيه نار في الهواء وبعدها البوليس جه واتعمل محضر وطلبونا عشان ياخدوا أقوالنا ونتسأل في النيابة وهو ده كل اللي حصل.
