مدمر نفسيًا.. عنبة عن أزمة عصام صاصا: مش بيدوس على الناس بفلوسه
علق مطرب المهرجانات عنبة، على أزمة مطرب المهرجانات عصام صاصا الأخيرة إثر اتهامه بدهس شاب ووفاته أعلى الطريق الدائري بالجيزة.
وقال عنبة خلال فيديو نشره عبر حسابه الشخصي بموقع تبادل الصور والفيديوهات انستجرام: أول حاجة إنا لله وإنا إليه راجعون، أنا طالع بقدم خالص التعازي لأسرة ضحية حادث عصام صاصا ربنا يرحمه ويصبركم، أنا حاسس بيكم لأن بنت عمي ماتت من 4 سنين أو أكتر وهي في زهرة شبابها وهي بتعدي برضه العربية خبطتها وجريت محدش وقف ليها.
وتابع عنبة: أنا عارف إن مفيش فلوس في الدنيا هتعوض ابنكم، ورسالتي لأهل الضحية أنا مش بلومكم في حاجة ربنا يصبركم موقف صعب أنتم مدمرين نفسيًا هنا وهو مدمرنفسيًا بس اللي عايزه أقوله هو مش بيخبط أي حد ومش بيدوس على الناس بفلوسه.
واختتم عنبة حديثه: بلاش حد يفهمكم حاجة عن الراجل اللي أنتم مش شايفين حالته بسبب الحادثة دي، الله يرحم الشخص اللي مات، الناس اللي على النت طالعين بس عاملين ينتقدوا فيه ومحدش مهتم يدعى للراجل، وده اسمه استغلال وتريند أبوس أيديكم يا تعزوا الناس لتسكتوا أفضل.
أزمة عصام صاصا
وكان مطرب المهرجانات عصام صاصا، تسبب في وفاة شخص يدعى أحمد مفتاح يبلغ من العمر 40 سنة، وذلك بعد دهسه أعلى دائري المنيب يوم الاثنين الماضي الموافق 6 مايو الجاري.
أول تعليق من عصام صاصا
وفي أول تعليق عصام صاصا بعد الإفراج عنه، استنكر هجوم الجمهور عليه بعد تسببه في وفاة شخص، ونشر عبر حسابه على الفيس بوك، وكتب: كل اللي بيحبوني واللي مبيحبونيش واللي شمتانين فيا يركزوا في الكلام ده، طبعا الحمد لله على كل حال وكل اللي يجيبه ربنا خير، بس ليه الناس شايفاني وحش؟ ربنا اللي يعلم إن الموضوع ده مأثر فيا قد إيه ويا رب ما حد يتحط في ربع الموقف اللي أنا فيه.
