فريدة سيف النصر: عمري ما زرت قبر والدتي.. والشريعة والأحاديث منعا ذلك
كشفت الفنانة فريدة سيف النصر، عن أنها لم تزر قبر والدتها منذ وفاتها، وكذلك لم تزر أي قبر ولا تحب أن تدخل المقابر، مشيرة إلى أن الشريعة والأحاديث يمنعان زيارة القبور حسبما قرأت.
وقالت فريدة سيف النصر خلال لقائها مع الإعلامي عمرو الليثي في برنامج واحد من الناس: مفكرتش أزور قبر والدتي وجميع المقابر ولم أزر جميع اللي توفوا أو زملائي وبنت أخويا غادة اللي يرحمها ماتت من أربع أو خمس شهور وأنا قرأت شريعة كتير ومش المفروض نروح المقابر وكذلك في الأحاديث.
فريدة سيف النصر: خايفة من الموت ومش مستعدة له
وأضافت فريدة سيف النصر: ومقدرتش أروح أزور أمي أو أبويا ولا مرة، وخايفة من نفسي وخايفة من الموت ومش مستعدة له وإحنا بشر بيجي في بالي أني نفسي أشوف أحفادي رالا وتاليا عرايس وأطمن عليهم وبرفض شغل علشانهم، وكذلك بخاف من أني لو روحت المقابر أفتح القبر وأنط جوه وأشوف أمي.
وتحدثت فريدة سيف النصر عن والدتها قائلة: ماما كانت قمر والناس لما يشوفوني منزلة صورتها يقولوا لي أنتي فاكرة نفسك حاجة.. وأبويا حفي عليها.
فريدة سيف النصر تكشف تفاصيل وفاة والدتها
وكشفت فريدة سيف النصر تفاصيل وفاة والدتها قائلة: كنت بعمل مسلسل موسى واتحايل عليهم علشان خاطري يا جماعة لما أنا قاعدة بالخمس ست ساعات من غير شغل هاتوني على شغلي فقط وكان وقتها هاني يسري مساعد المخرج الأول ومحمد سلامة المخرج لكن مع الأسف وهفضل اضرب نفسي 500 جزمة عليها أني كنت في التصوير وقالوا لي الحقي ماما روحها بتطلع وبتقول فريدة.. كان ذل وقلت لهم أنا ماشية وخدت العربية وقلبي اتنتش وحسيت ان الكلام صح ولما وصلت ما لقتهاش وكان نفسي اودعها.
فريدة سيف النصر تبكي خلال حديثها عن والدتها
وبكت فريدة سيف النصر خلال حديثها عن والدتها قائلة: أصل دي بنتي مش أمي بسبب اليتم اللي شافته في حياتها وعملت لها سبع عمرات وحجتين وبقول للي عنده أب وأم أقعداوا تحت رجليهم وهتندموا على كل لحظة مكنتوش معاهم.
فريدة سيف النصر تكشف تفاصيل وعكتها الصحية
وكشفت فريدة سيف النصر تفاصيل الوعكة الصحية التي مرت بها، قائلة: دخلت العناية المركزة وما قدرتش اقعد فيها لأني مابحبش المستشفيات وعملوا ليا قسطرة وما كانوش عارفين القلب ولا الكلى ولا الكبد وتحاليلي كلها مكانش فيها حاجة وكانوا بيهزروا وقالوا نشوف لها عريس، على الرغم أن رجلي كانت بتورم وتحمر أو يغمى عليا واترمي وقالوا لي فيه حشرة صغيرة قرصتك ومكناش عارفين إيه السبب.
على جانب آخر، كشفت الفنانة فريدة سيف النصر سبب تغيير النهاية في مسلسل العتاولة وهل تعمد المخرج منعها من استكمال المسلسل، وقالت: مفيش حاجة من اللي اتقالت صح ودي وجهة نظر مخرج ومؤلف تحترم وممكن يكون فيه مفاجاة وبديهي لما مخرج ناجح وشايف حد ناجح ومن أسباب نجاح المسلسل مش معقول هيضحي بيا من غير أسباب ولو كان فيه مشاكل بينا أكيد كان هيخلي الشغل على جمب، والنهاية لم تتغير لمرضي.
