مها أحمد باكية: “ابني مش مستجيب لأي دواء.. وحاسس بالموت” (فيديو)
روت الفنانة مها أحمد وزوجها الفنان مجدي كامل، أسباب كتابة نجلهم المنشور الذي عبر به عن المأساة والظروف الصعبة التي يمر بها، وقالت:” أنا اتفاجئت زي كل الناس، رغم إننا في أوضة وهو في أوضة جنبي، وأنا متبعاه في العلاج في كل حاجة، وحاسة بيه لإني مريت بنفس الرعشة اللي حصلت له، وإحنا حصلنا حاجات غريبة الفترة دي”.
وتابعت مها حديثها، خلال مداخلة هاتفية في برنامج التاسعة، مع الإعلامي وائل الإبراشي، قائلة: “والحكاية بدأت زي كل الناس واتحايلت على مجدي إننا نروح الساحل، وإحنا محبوسين في البيت علشان الكورونا، فقولتله نتحبس أحسن في الساحل هناك، وفعلا روحنا هناك وأول مرة أخرج كنت هعمل حادثة، وساعتها كنت رايحة اتغدى مع عادل وأصحابه، وسمعني في التليفون وأنا بصرخ، ومن بعدها كان عند عادل قصة حب وانتهت، ووقفت جنبه أنا ومجدي، وبعدها حصل وفاة صاحبة اليوتيوبر مصطفى حفناوي، ثم بعدها فجأة بيتنا غرق، وشقا عمرنا كله راح”.
نجل مجدي كامل ومها أحمد: “حياتي بايظة والدكاترة مش عارفين عندي إيه”
وأردفت: “وبعدها طلبت من عادل أشوف البحر، وفجأة وإحنا واقفين جات موجة خدتني وأنا مش بعرف أعوم، وعادل بقى مش عارف يجيبني، وبمجرد ما جينا مصر، أنا تعبت تعب جامد جدا ومكنتش قادرة وكان عندي إلتهاب رئوي شديد على صدري، فافتكرنا كورونا، ولكن التحاليل جات كويسة، وكنا خايفين على ابننا أحمد، فبدأ مجدي يلبس ماسك وتولي مسئولية الاهتمام بأحمد لوحده”.
وأضافت: “بعدها اتفاجئنا بعادل مش قادر يقف، وحالة نفسية سيئة جدا، ومفيش استجابة لأي علاج، وبعدين عادل رياضي وبيلعب كرة، وبيروح الجيم وملتزم، وفجأة الدنيا اتقلبت، وإحنا مش بنحب نتكلم عن حياتنا الشخصية، واتفاجئنا إنه كتب كل المآسي اللي مرينا بيها”.
وقال مجدي كامل عن نجله عادل: “هو حاسس بالموت وإن العمر قصير، والدنيا صغيرة وضيقة، وإحنا حتى محسودين على أحمد ابننا، بالرغم من إنه حالة خاصة”.
وعبرت مها أحمد عن حزنها الشديد لأنها بسبب مرضها لا تستطع الاقتراب من نجلها أحمد، بسبب ضعف مناعته وهي تخاف أن تنقل له أي فيروس، وقالت: “أنا بقالي شهور نفسي أخذه في حضني ومحرومة منه، أنا بقالي شهور محرومة إن أنا أبوس ابني وألمسه، من أيام الكورونا ومن بعدها، وبعدها أتعب وأخاف ألمسه أو أكون جنبه، وأنا بقيت أقف على باب أوضته من بعيد علشان بس أسمعه صوته وأعرفه إني موجودة”.
نجل مها أحمد ومجدي كامل بعد غرق منزلهم: “الحسد كان شديد أوي” (صورة)
