من نص التحقيقات.. صديق طفل المرور: "حاولنا نهديه وهو كان قاصد يهزأ الأمين" (مستندات)
يواصل "القاهرة 24" نشر نص التحقيقات في قضية طفل المرور، التي أثارت موجة عارمة من الغضب على مواقع التواصل الاجتماعي، بعد إهانة الطفل و3 من أصدقائه، أحد رجال الشرطة والتنمر به.
سر اختفاء طعن شقيق بطرس غالي على حكم سجنه في قضية الآثار الكبرى من رول الجلسة
ووجهت النيابة العامة في سؤالها إلى المتهم يوسف محمد مصطفى على البالغ من العمر 18 عامًا صديق طفل المرور عدة أسئلة جاءت على النحو التالي:
س: ما صلتلك بالمقاطع المرئية الثلاثة الأولى المعروضة عليك؟
ج: الفيديوهات الثلاثة دول خاصين بواقعة المشكلة مع أمين الشرطة والفيديو الأول وقت لما كنا كلنا راكبين العربية المرسيدس والأمين وقف أحمد وطلب الرخصة منه وأحمد شتم الأمين في الفيديو ده والفيديو الثانى كان بعد ما أحمد شتم الأمين وجرى وبعدها وقفنا بعيد ونزلنا كلنا روحنا للأمين ونتكلم معاه والفيديو الثالث برضه وقت ما كنا واقفين مع الأمين برضه.
تحويلات مرورية بمحيط كوبري وميدان الفردوس لمدة 15 يومًا (تفاصيل)
س: وضح لنا من هم الأشخاص الظاهرون بالمقاطع المرئية الثلاثة والمشار إليها سلفًا؟
ج: الفيديو الأول أول اتنين ظهروا فيه هما أحمد وأمين الشرطة ودي ساعة المشكلة الرئيسية وأحمد ساعتها كان قاعد في العربية كلنا كنا قاعدين في العربية، والفيديو الثانى أول اتنين ظهرا فيه هما أحمد والشخص الطويل اللى لابس تيشيرت رمادى ده اسمه عمرو أحمد وشهرته تايسون والشخص اللى لابس تيشيرت بيج واللى جه في نص الفيديو ده أنا ومصطفى مكانش ظاهر في المقاطع دى لأنه كان بيصور.
س: بأى وسيلة تم تصوير تلك المقاطع؟
ج: مصطفى صور الفيديوهات دى كلها بتليفونه.
س: وما هو دورك أثناء تصوير ذلك المقطع؟
ج: أنا لما وصلت في نص الفيديو لاقينا أحمد بيشد مع الأمين، فأنا حاولت أهديه وقولتله ما أنت اللى كسرت المراية ولما لاقيت أحمد بيزيد في تهزيئ الأمين قولتله امشى من هنا.
س: وضح لنا من قائل لفظ السباب بالمقطع الرابع الذى لم يظهر هوية قائلة؟
ج: أحمد وشهرته حريقة هو اللى شتم الأمين بس الكاميرا ماكنتش جايباه وجابته بعدها بعد ما شتم.
س: ما المقصود بالعبارة الواردة بالمقطع الثالث على لسان المتهم أحمد العربية دى عليها حصانة؟
ج: هو قصده يقول للأمين أنه ميقدرش يعمل حاجة مع أحمد ولا مع العربية.
س: ومن قائل عبارة أنا بصور اللقطة لوالده وبس؟ وبماذا يقصد؟
ج: ده مصطفى وقصده إن الفيديو هيبعته لوالد أحمد.
س: ما المقصود بالعبارة الواردة بالمقطع الثانى على لسان المتهم أحمد والله أنا كفيل أكلك علقة أموتك؟
ج: أحمد قصده أنه يهدد أمين الشرطة.
س: ولما قام المتهم أحمد بإتيان ما سبق؟
ج: هو أحمد قال كده علشان معتمد على سلطة أبوه وإنه معاه حصانة.
س: ما صلتلك بالمقطع الرابع المعروض عليك المصور عبر لايف موقع التواصل الاجتماعى إنستجرام؟
ج: المقطع ظاهر فيه أحمد والناس التانيين اللى معاه أعرفهم من شكلهم، وشكلهم عاملين بث مباشر وبيشتموا فى الناس اللي بتكتبلهم في التعليقات.
س: ما صلتك بالمقطع الخامس المعروض عليك؟
ج: المقطع ده ظاهر فيه أحمد والعربية اللى راكبها هي نفس عربية أبوه والمقطع شوفته من شهرين.
س: ما هو سبب قيام المتهم بالتحدث مع فرد الشرطة بتلك الطريقة؟
ج: هو أكيد بيستهزأ بأمين الشرطة وبيعتمد على سلطة أبوه.
س: وما هو قصدكم من ارتكاب الواقعة؟
ج: أنا معملتش أى حاجة، وأحمد هو اللى هزأ أمين الشرطة وسخر منه، وحتى أول الواقعة عمرو ومصطفى ورامز هما اللى ضحكوا على موضوع الكمامة، وأنا كمان ضحكت معاهم بس محدش فينا اتكلم ساعتها، واحنا اللى خلينا أحمد يعتذر لأمين الشرطة.
س: وما قولك فيما قررته سلفًا بصدر التحقيقات من أنك لم تبادر بالسخرية مثل باقي المتهمين بشأن واقعة الكمامة؟
ج: أنا مرضيتش أقول كدة في الأول، بس الحقيقة أنا ضحكت زيهم، وأنا عايز أقول إنى هزأت أحمد وقولتله يعتذر لأمين الشرطة.
