ليلى علوي عن وحيد حامد: "فقدنا دماغ كانت مهمومة بالمواطن المصري والإنسانية"

السبت 02/يناير/2021 - 10:44 م

رويت الفنانة ليلى علوي، مواقف جمعتها بالراحل الكاتب الكبير وحيد حامد، الذي وافته المنية اليوم السبت، بعد صراع مع المرض، عن عمر ناهز الـ 76 عاما.

وقالت ليلى علوي في مداخلة هاتفية عبر برنامج " كلمة أخيرة" الذي تقدمه الإعلامية لميس الحديدي على شاشة "ON": "الراحل كل أعماله في السينما وبصماته وتأثيره في الشارع وحب الناس ليه موجود ومستمر، وبالنسبة لي أنا حزينة جداً لأني فقدت دماغ بتكلم معاها وبفكر معاها وبشوف بتفكر إزاي؟ وبتحلم إزاي؟ وهي دماغ مهمومة بالإنسانية والمواطن المصرية والبلد وكل صغيرة وكبيرة، فعلا الكويسين بيروحوا".

وأكملت علوي: "كان عنده إيجابية على طول رغم أنه كان بيكتئب ويغضب ويحزن كتير لكن سرعان ماكان ذلك يتحول لإيجابية وطاقة وتحدي وصراع وإصرار أن يكتب ويكمل وحول فيلم إضحك الصورة تطلع حلوة، كفاية عنوان الفيلم واسم الفيلم".

وتابعت: "أنا عملت معاه فيلم "المساطيل" كن رائع.. إزاي كان بيجيب النجوم وكل واحد يبقى عنده لغته ويعرض مشكلته وحوار كل شخصية، مش عاوزة أتكلم أنا عملت معاه إيه، لكن أتكلم إحنا ااتعلمنا من أعماله إيه؟ سلسلة من الأعمال السينمائية والدرامية أثرت فعلياً وحقيقي داخل المجتمع المصري حتى لو عرضت لأجيال أخرى لازالت ممتعة والناس مبسوطة بيه وبحواره".

واختتمت مداخلتها قائلة: "كان ذكي قد إيه كان بيرشق صح في المكان المظبوط دقيق ولاحرف أطول ولا أقصر، كان مبدع ولديه ملكة الكتابة، وكان يحب الشباب ويتحدث معاهم ويستمع إلى مشاكلهم ويرى أحلامهم كان عايش 24 ساعة في الحياة".