أنا مش سترونج

جربتي تعيشى دور الـ strong woman جربتي تيجي على نفسك علشان ترضي اللي بتحبيهم؟! أو كنوع من التحدي بتثبتي بيه إنك مكتفيه بذاتك وتقدري تستغني؟ أو حتى علشان تظهري مسيطرة قوية مالكة زمام الأمور؟!

أحب أقولك لو انتى من الشخصيات اللي ضاغطة على نفسها علشان تظهر دايما بصورة القوية اللى مفيش منها اتنين واللى مش محتاجه دعم من حد لو انتى عايشه فى دور الروبوت اللى مطالب منه يقوم بوظائفه بصورة مثالية بدون ما يكل ولا يمل احب اقولك انك خسرانة.

سمعتي عن نظرية (الحق المكتسب) نظرية من أهم النظريات اللي درسناها في (القانون الإداري) اختصارها أنها بتنص على الحصول حق معين بتصرف قانوني لم يكن موجود بماده قانونيه في الأساس.

 انتي بكل تضحياتك هتتحولى لحق مكتسب واللى قدمتيه ليهم بإدراتك وهو مش واجب عليكى هتتلامى لو بطلتى تقدميه، ده غير إنه هيطمن عليكى ولو اطمن عليكى هيبطل يفكر فيكى ده فى الحالة الاولى حالة الشخصيه المضحية (الشمعة المحترقة). 

أما في حالة الندية اللي هدفها السيطرة لو فكرنا شويه هنلاقى ان ربنا خلقنا جنسين وخلق كل جنس فينا له اسلحه ومواطن قوه، إحنا للأسف اختلط علينا الأمر القوة الحقيقية فى استخدام أسلحتك مش أسلحة الآخر.

قبل ما نحدد السلاح المستخدم لازم نكون عارفين الهدف المراد تحقيقه واستراتيجية الطرف الآخر.

ربنا أعطى الرجل الأسلحة اللى تقدر تخليه يكسب المعركة من قوة القوامة لولاية الأمر قال الله تعالى: (الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّـهُ بعضهم على بعض).

وفى المقابل أعطى المرأة الأسلحة اللى تجبره على "الاستسلام الطوعي" دون أدنى مقاومة ربنا أعطاكى أسلحة تخليه ينزل من على حصانه ويسلمك سلاحه بكامل إرادته .

دموعك سلاح، استكانتك سلاح، احتياجك له سلاح، سيان كان هدفك من الاستقواء راحة ودعم اللي بتحبيهم أو اكتساب حقوق وزرع فكرة إنك مستغنية وكاملة وعندك اكتفاء بذاتك، في الحالتين هتتعبي بلاش تعيشي سجينه القوة الزائفة، لأنك هييجي اليوم وهتنهاري هتقعي وقتها محدش هيحس بيكي ولا هيتعاطف معاكي لأن اللى حواليكي مش هيبقوا شايفين إن فيه مشكلة من الأساس وهيبقى مطالب منك تكملي عادي ومش هيتعمل لك حساب من الآخر كده مش هتتشافى ولا يتحس بيكي.

حبي نفسك وقدريها مفيش حد واخد حقه أد البنت اللي تغرق في شبر ميه وتحسسه إنها محتاجة اللى بتستنى أنه يرجع علشان يفتحلها برطمان الصلصة اللي مش بتعرف تفتحه، اللى بتحل نص مشاكلها بدمعتين والنص التاني بابتسامة 

اللي عرفت أسلحتها وحددت هدفها وعاشت الدور اللي اتكتب علشانها مش اللي اتكتب للطرف التاني

خليكى قوية لكن مش مستقوية قوية بفطرتك اللي ربنا خلقك عليها متتكسفيش تعيطى وتتحايلي (أخذ الحق حرفة) الندية والجفاف واللهجة الحادة وتبادل الأدوار مش من مصلحتك. 

بلاش تبقي بـ100 راجل صدقيني إنتي الخسرانة خليكى بـ100 ست.