رئيس التحرير
محمود المملوك

"بتحلب 6 لتر لبن في اليوم".. بقرة ضمن جهاز عروسة بالدقهلية (فيديو)

عم العروسة
عم العروسة

تداول رواد مواقع التواصل الاجتماعي "فيس بوك"، فيديو لبقرة من ضمن جهاز عروسة بقرية الحجايزة التابعة لمركز السنبلاوين بمحافظة الدقهلية.

قال الشيخ حمادة العدروسي، عم العروسة، لـ"القاهرة 24": "البقرة دي مساعدة للعريس والعروسة بدل المغالاة في تجهيزات الزواج، خاصة إن إحنا في القرى بنحب نشتري جهاز كتير".

وأضاف: "البقرة دي منفعة للعريس والعروسة خاصة إن المعيشة صعبة، والموضوع ده عايزينه يتعمم في جميع أنحاء الجمهورية، واللي يقدر يعمل كده يعمل مش بنحمل حد فوق طاقته".

وتابع: "ناس شتمتنا وهاجمتنا، ولكن احنا عملنا ده لأنه هيساعد العائلة كلها، البقرة بتحلب كل يوم 6 لتر لبن، وبتجيب قشطة وجبنة".

وأكد عم العروسة: "نسبة العنوسة زادت بسبب المصاريف والتكاليف في الزواج، والرسول أوصى بعدم المغالاة في الزواج ولكن فيه ناس في بعض القرى بتزايد في موضوع الجهاز".

ومن جانبه، قال ابن عم العروسة، متولي أبو حصبلة، وصاحب فكرة البقرة: "العروسة والدها متوفى وهي زي أختي بالظبط، والعريس ابن عمتي، وفكرة البقرة منفعة بدل من  الكراكيب التي لم يستفيدوا منها".

وتابع: "إحنا جبنا جهاز حلو وقيم ولكن معقول، أنا قولت بدل ما نجيب أشياء ملهاش لازمة نجيب حاجة أولا مش هنشتريها ثانيًا هي هتنفع العريس والعروسة ويقدروا يفتحوا بيت بعد كده".

واختتم قائلا: "إحنا لم نقصد أن ننشرها على مواقع التواصل الاجتماعي أو عايزين حد يعمل كده الفكرة إن دي هدية هديتها للعريس والعروسة لأن إحنا أهل".