فتاة توثق لحظة التحرش بها وملامسة أجزاء من جسدها بالقطامية (فيديو)
تداول مستخدمو مواقع التواصل الاجتماعي “فيسبوك” فيديو لشاب يعمل سائق توك توك، أثناء تحرشه بفتاة أمام نادي القطامية جاردنز، ومحاولة ملامسة أجزاء من جسدها.
وأظهر الفيديو نشوب مشاجرة بين سائق التوك توك والفتاة التي حاولت توثيق الواقعة بتصوير الشاب بهاتفها المحمول، وقيام الأول بمحاولة خطفه وإلقاء الحجارة عليها.
جميل حسام صديق الفتاة كتب قائلًا: "صديقة ليا النهارده حصلها موقف مش هقول إنه غريب لأن للأسف مبقاش جديد على شريحة كبيرة من مُجتمعنا، وبعض الأشخاص فيه، وللأسف أنا مكُنتش متواجد إمبارح تم الاعتداء عليها جسديًا، وهي طالعة من نادي القطامية جاردنز جنب نادي الصيد على الدائري من البطيء جِه توكتوك عمال يشتم، ويقولها كلام مُقرف ودة لبس تلبسيه يا بنت كذا وكذا ومشي قُدامها".
وتابع: “صديقتي وقفت وهي في عادتها بتروح وبترجع النادي عن طريق النفق اللي بالضبط قُدام harmony partner school، وقُصاده الناحية التانية مودرن أكاديمي، فَوقف هناك نزل من التوكتوك قعد يشوح بأيديه، ويشتم وكان جي يضرب أُختها لأنها كانت بتصوره فَ وقفت في وشه وصدته قام ضاربها بالقلم والبوكس وكان بيقلع الشبشب ورمى عليها طوب وحاليًا جسمها كله كدمات”.
وأضاف في منشوره على "فيس بوك"، قائلا “ده طبعا وراه صف رجالة واقفين بيتفرجوا وفيه شوية ذكور فضلوا يقولوا لها إمشي وسيبي ومتصوريهوش وبيدافعوا عنه، وهي اتصلت بالنجدة فوق التلت مرات محدش جِه، وراحت قدمت محضر عند قسم المقطم، وفيه ضابط اتصل بيها وقالها روحي هناك وريتله صورته والڤيديو، وقالها المحضر هيبقي مفتوح، إلا لما يتجاب اسمه وهي مش عارفة تجيب اسمه ازاي”.
واختتم حديثه: “أنا مش فاهم لحد امتى هتفضل الظاهرة دي في الشوارع بالذات من بتوع التوكتوك وغيرهم وما أكثرهم، ولحد امتى مش هيبقى فيه قانون رادع ليهم يقوم سلوكهم ويعدله، يا ريت تساعدونا نلاقي الشخص ده وياخد عقابه المُستحَق”.
