فريدة سيف النصر تذكر موقفًا لرياض الخولي مع محمد رمضان: "دخل الكرفان لقاه بيغير الجلابية فزعق ومشاه"
ذكرت الفنانة فريدة سيف النصر، موقفًا سابق جمع الفنان رياض الخولي والفنان محمد رمضان، أرادت من خلاله أن توضح بعض الصعوبات التي مر بها رمضان في بداية مسيرته الفنية، مشيدةً بأخلاق كلًا من النجمين.
وكتبت فريدة منشورًا، عبر حسابها الرسمي بموقع التواصل الاجتماعي “فيس بوك” قالت فيه: "علشان تعرفوا هحكى حكاية بعد إذنكم جميعًا هتعرفوا منها كتير.. قاعدين بنتفرج على مشهد وبنتكلم في الاستراحة، ودخل حبيب قلبي رياض الخولي اللي هناني بأدائي في أعمالي، ورياض معلم ونعلم جميعا قدر بعض ونحكي عن الصعوبات وذكريات ومواقف".
وتابعت: "وفجأه التفت لرمضان وقال له أنا زمان كنت أنت شغال معانا وكانوا جايبين لي كرافان، ده رياض اللي بيقول وكمل دخلت لقيتك بتغير جلابية والإنتاج سمح لك فروحت مزعق وقولت مين جاب ده هنا وزعقتلك ونزلوك.. وكمل رياض وقال له أوعى تكون زعلان مني دي أخلاق رياض.. رد رمضان وقال حقك يا أستاذ وأنا عمري ما أزعل من حق حد وحضرتك على راسنا وأنا والله ما فاكر حاجه".
وأضافت: "أكيد ده اتكرر كتير مع محمد حاجات حكاها وحاجات لأ، واهو بقى له معجبين في العالم ونجم وبطل ومحبوب وماديا ماشاء الله وده رد ربنا، يوم أنا بقي ما تقابلت معاه لأول مرة لقيت فراشة حلوة طيبة جت جري عليا وبوس راس وايد وترحيب واخلاق وكلام طيب، والله العظيم باشتغل مع عيال بمعنى كلمة عيال سواء شهرة أو كم أعمال أو جماهيرية من النوعين ذكر وأنثى بتبقى بعيد عنكم ضربة القلب والغرور ياعين امهم فهمهم غلط ان التناكه بداية النجومية والنجاح..لا بيفشلوا بعد شوية".
