ميرضيش ربنا .. حلا شيحة تعلن توبتها عن مشاهدها في فيلم مش أنا (صورة)
أعلنت الفنانة حلا شيحة، توبتها عن المشاهد التي جمعتها بالفنان تامر حسني في فيلمهما الجديد مش أنا ، والذي يُعرض حاليا في السينمات.
حلا شيحة و تامر حسنى
نشرت حلا شيحة بوستر الفيلم عبر حسابها الشخصي بموقع الصور والفيديوهات القصيرة “انستجرام”، وقالت: “أنا اتفاجئت جدا بنزول كليب يجمع فيه مشاهد متفرقة من الفيلم وفي أيام ذي الحجة.. أيام مُباركة وخصوصًا بعد آخر بوست نزلته ووضحت فيه أنا إيه، واتفاجئت أكتر خصوصًا بعد وعد تامر حسني ليا وتأكيده إنه هيحترم رغبتي، وبعض الطلبات اللي طلبتها منه بكل احترام وود الصيف اللي فات، وأكدلي إنه هيحترم رغبتي”.
وتابعت حلا شيحة : “إحنا يمكن نجحنا بمقايس الدنيا، بس صدقوني بمقايس ربنا إحنا لم ولن ننجح، أنا عارفة ومتأكدة إن زملائي جُواهم خير، بس للأسف فتنة الشهرة والنجاح مش بتخلينا نشوف ونقيس الأمور صح.. بتكلم من قلبي، الكليب ده ميرضيش ربنا، وأنا عيطت لأني شفت نفسي في المشاهد دي، دي كانت زلة نتيجة ظروف مريت بيها، وكلنا بنغلط ولازم نغلط، علشان إحنا بشر بس المصيبة إننا بنغفل وبننسى”.
وأضافت حلا شيحة : “أنا مش هتكسف من حد.. أنا تبت من المشاهد دي وهي لا تصح، وأنا غلطت وبصلح وأهم حاجة إن ربنا يرضى عني لأن في الآخر ده اللي هينفعنا.. مش الشهرة ولا النجاح، لا هو مش نجاح أصلا.. علشان النجاح الحقيقي حاجة تانية خالص.. إحنا أغلبنا ناسينها إلا القليلين منا”.
حلا شيحة لتامر حسنى
واستكملت الفنانة حلا شيحة : “الفن لو بيخلينا نبعد عن منهج ربنا ومنبقاش قُدوة لولادنا يبقى باطل وميبقاش فن.. إحنا كلنا عندنا امتحان في الدنيا دي وحابة أفكرك بالفيديو ده يا تامر اللي قولت فيه أنا مش بتمنى أموت وأنا مطرب، أنا دايمًا خايف من كده، كلام أكيد قولته في لحظة صدق جُواك وجوانا كلنا”.
واختتمت حلا شيحة حديثها: “شوفه تاني يمكن يفكرك إن جواك أكيد في صراع وأنا وكلنا.. كلنا بنغلط بس المهم في الآخر نتدارك الغلط ونصلح..{إِلَّا مَن تَابَ وَءَامَنَ وَعَمِلَ عَمَلࣰا صَـٰلِحࣰا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰتࣲۗ وَكَانَ ٱللَّهُ غَفُورࣰا رَّحِیمࣰا}.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد”.
