سائق “كريم” يعتدي على شاب والشركة تعوضه عن اصابته برحلات 300 كيلو مجانًا (صورة)
تعرض شاب لواقعة اعتداء من أحد سائقي شركة “كريم” لنقل الركاب، مما تسبب في اصابته بارتجاج في المخ كما اصيب بكدمات في وجهه، وذلك يوم السبت الماضي.
وبحسب ما قاله المجني عليه، عمر رضوان، فانه كان في طريق لاجتماع عمل في منطقة الزمالك، فطلب سيارة من شركة “كريم” وحينما وصل السائق، الذي يبلغ عمره فوق الخمسين عامًا، فوجئ رضون بأنه شخص عصبي دون سبب.
يقول رضوان: “قلتله: سلام عليكم يا حج، راح رد بأسلوب فيه بداية العصبية ده وقال: وعليكم السلام ياخويا، فقلت في سري اه الراجل شكله مش طايق نفسه، المهم قالي على فين قلتله زمالك فقبل مايخش من الطريق اللي هو عارفه قلتله لأ لأ خش من هنا طريق مختصر وفاضي راح مشي زي ماقلتله وهو بيبرطم فحطيت سماعات فى ودني عشان اتجاهله، بعد شوية وصلنا عند شارعين موازيين لبعض، واحد زحمه والتاني جانبي وفاضي فمن الطبيعي اقوله خليك في الفاضي، وأول مادخلنا الشارع فتح في الزعيق: انت مدخلني شوارع مكسره!! العربية حرام عليك.. أنتم ماعندكوش دم، فقلت ده راجل كبير برضه فأخدت معاه اسلوب اظرف من اني ارد عليه بنفس اسلوبه وقلتله: يا حج لو كل واحد بيخاف على عربيته من الشوارع المكسرة كلنا هنركن على جنب وحقك عليا امسحها فيا، راح مكمل وقال: يا عم انت مالك انا عايز اركن على جنب هو انتم استعبدتونا، من الواضح ان هو عايز يزعق وخلاص فقعد يقول كذه حاجة مالهاش معنى وكان ردي كل مرة: هدي نفسك وحقك عليا، لحد ما بطل زعيق وسكت”.
وتابع رضوان: “شوية وابتدى زعيق تاني وقال: بعدين انت لما بتركب تاكسي بتقوله خش يمين وشمال ولا هو اللي بيمشيك على مزاجه؟، قلتله: لا بقوله خش يمين وشمال وعادي جدًا، وبعدين انا مش راكب تاكسي، راح قايل: يعني انا شغال عندك.. انتم فاكرين نفسكم ايه.. واخدينا عبيد عندكم، وقعد كده شوية من غير ما اقوله حاجة لحد ما سكت”.
وأضاف أنه فور وصوله إلى طلعة كوبري أكتوبر من تجاه غمرة، فقال له: “شايف الناحية دي زحمة ازاي، الحمدالله اننا طلعنا من هنا” فرد السائق: “زحمة ايه؟ الكوبري عمره مابيبقى”.
وأردف رضوان: “فقلت برضه افرفشه وقلتله: يا سيدي الجيش اهو مظبطلنا الطرق والكباري وهيسفلت طريقكنا قريب، وفجأة كأني دوست على زرار، بدأ يسب ويلعن في العالم كله ويكسر على عربيات جنبه لدرجة ان ناس جت جنبي تزعقلي فكرينه ابويا أو حاجة، وهنا أول مرة اعلي صوتي وقلتله: اهدى ياعم بقى عشان انت كده زودتاها قوي وانا صابر عليك عشان انت راجل كبير مايصحش اللي انت بتعمله ده، قعد يعلي صوته وفجأة راح شاتمني بالأم وضربني بالبوكس في بقي، انا في اللحظة دي عملت زي ما آي حد مكاني هايعمل وضربته دفاعًا عن النفس، وابتدينا نضرب في بعض واخيرًا لما فتح اللوك بتاع العربية نزلت وشايل شنطة في ايدي وواحد ابن حلال بموتوسيكل قاللي سيبك منه تعالى اركب ورايا هوديك صيدليه ولا حنفية تغسل وشك، الناحية التانية الناس بتقول للسواق اهدى بس هو ماهديش وراح نازل وجاب عصاية من شنطة العربية وضربني على ضهري ورأسي وانا مش واخد بالي والموتوسيكل راح مدور بسرعة وجري بينا”.
وأوضح المجني عليه أنه ذهب إلى صيدلية لمداواة جرحه ثم ذهب إلى مستشفى لعمل أشعة مقطعية، وظهر من خلالها إصابته بارتجاج في المخ، مضيفًا أنه تواصل مع شركة “كريم” وأرسل لهم بريد إليكتروني به صورته وهو مصاب دون أن يقول أي شئ، فتواصل معه الشركة.
واستطرد: “الحقيقة كلموني يسمعوا مني ايه الحصل وقلتلهم ووضحولي ان الكابتن اترفد وقالولي هايكلموني كمان شوية وكلموني مرتين كمان وكننا بنتفاهم لحد ما واحد قاللي حاجة هي اللي خلتني اكتب البوست ده، قاللي: استاذ عمر واضح قدامي ان حضرتك عمات معانا 2300+ رحلة ودي كانت مرة واحدة منهم فارجوك ماتحسبناش عليها، وواحد تاني قاللي: انا توصلت للإدارة وبنقدملك پاكيدچ كريم 300 كيلو ببلاش صالحة لمدة شهر، قلتله: لا لا ماتكملش شكرًا لمكالمتك مع السلامة”.
وعبر رضوان عن غضبه من هذا التصرف قائلًا: “ماحاسبكوش على المره دي؟ هي المره دي المفروض تحصل اصلاً؟ و300 كيلو ايه وهباب ايه؟ انتم اهم حاجة عندكم الفلوس وبتشغلوا اي حد من غير ماتعرفه هو دماغه فيها ايه ولا بيفكر ازاي عشان يتعدى على عميل عشان الطرق مكسرة”.
وأضاف رضوان أن سبب تحمله لتلك العصبية الغير مبررة، أنه يرى أن ظروف الحياة باتت صعبة وعلى الناس تحمل بعضها البعض، كما أن السائق رجل كبير في السن وليس من اللائق الاعتداء اللفظي عليه، بالإضافة كونه يرى أن القصة برمتها ستنتهي فور وصوله إلى المكان المتجه إليه.
