مدحت العدل: شريهان بكت بعد عرض "كوكو شانيل" بكاءً مرًا
كشف الكاتب والسينارست مدحت العدل، ردة فعل الفنانة شريهان بعد عرض مسرحيتها "كوكو شانيل، والتي عرضت مؤخرًا على منصة شاهد، ولاقت إعجاب عدد كبير من الجمهور.
وقال العدل فى ندوة بـ "القاهرة 24": "دارت بيني وبين شريهان مكالمة بعد عرض المسرحية، وشريهان حساسة جدًا بكت بكاءً مرًا، وكانت بتشكر ربنا، وكلنا بنشكر ربنا، لأن بعض الأحيان تعمل كل المجهود ده ولاي سبب متلاقيش كل النجاح ده".
وأستكمل: "كانت مكالمة شديدة العاطفية، هي عيطت، وأنا كمان كنت عاوز أعيط لأن دمعتي قريبة زي عائلة العدل كلها، وشريهان كانت سعيدة ومبسوطة".
وقال عن فكرة المسرحية: "أحنا كنا متخوفين من فكرة كوكو شانيل، لأنها واحدة أجنبية بتاعة موضة، فكان من الممكن أن يكون لها فئة معينة بتتفرج عليها، ولكن لم نجد ذلك، كانت الناس العادية جدًا مبسوطة، ومنبهرة، وده شئ لفت نظرنا وده اللي شريهان كلمتنا عليه".
وأضاف: "أنتوا مش متخيلين كم المعارك اللي بتحصل على أي عمل بيني وبين جمال، والمونتير وغيرهم، الكواليس بيحصل فيها مليون قصة، ولكن كله فى النهاية لمصلحة العمل".
