الأمن يفحص منشور واقعة التعدي على طفل معاق ذهنيًا داخل سيارة بالتجمع
أعلنت مصادر أمنية، فحص منشور متداول عبر مواقع التواصل الاجتماعي، لواقعة التعدي بالضرب على طفل معاق ذهنيًا داخل سيارة ملاكي أعلى الطريق الدائري بالتجمع.
وفي وقت سابق، تداول رواد "فيس بوك"، منشورًا لسيدة تدعى يسرا كتبت: “أنا مش عارفه اكتب فين وعلى إنه ي جروب والا اعمل ايه أنا متلخبطة، من ساعه ما شوفت العربية دي الصبح على الدائري ناحيه التجمع والسواق اللي فيها بيضرب ولد ذوي احتياجات خاصة - معاق ذهنيًا وجسمانيًا- راكب معاه في العربيه وأنا هتجنن".
وأضافت في المنشور: "قعدت ازنق عليه بالعربية واضرب كلاكسات كتير ولقيت عربية تانية فيها راجل محترم شاف نفس المنظر اللي انا شوفته كسر عليه بالعربية وفتح الشباك، وزعق قاله انت بتضربه ليه وانت تقربله ليه والراجل اتوتر وقاله مضربتوش".
وتابعت: "المنظر كان صعب وهو سايق بيلف يضربه جامد وحبيبي غلبان قاعد ورا لا حول له ولا قوه، يارب أهل الولد يشوفوا البوست ورقم العربية اللي معرفتش اعمل حاجه غير إني أصورها".
وأضافت: "ارحموا ولادكم من السواقين، وبالذات لو طفل ذوي احتياجات خاصة ارجوكم انا قلبي اتقطع من اللي شوفته، حسبي الله ونعم الوكيل في كل بني ادم يمد ايده أو يأذي ملاك زي ده".
