الأم صاحبة تورتة ملحق التاريخ: حلم بنتي ضاع فقلت بلاش أضيع فرحتها كمان
في لفتة غريبة من نوعها، وموقف ممزوج بحنان الأم، أقدمت إحدى الأمهات تدعى أسماء الرفاعي، على إسعاد ابنتها ملك سلام، التي خرجت من الثانوية العامة مكسورة الخاطرة، بعد حصولها على دور ثاني في مادة التاريخ.
في الوقت الذي تواجه ملك، طالبة الثانوية العامة، ضغوطًا نفسية بسبب النتيجة، قررت والدتها مفاجأتها بـ تورتة، مكتوب عليها «شايلة التاريخ»، لتخفيف الضغط عليها، مما جعلها حديث مواقع التواصل الاجتماعي خلال اليوم.
تقول الأم: بنتي ثانوية عامة، وللأسف شالت التاريخ، طبعا كان يوم أسود على كل الأهالي بما فيهم أنا، وعشان أطلعها من حزنها، عيد ميلادها كان امبارح، حبيت أفرحها بمفاجأة.
وأضافت خلال حديثها لـ القاهرة 24: وقلت في نفس الوقت أطلعها من محنتها بحاجة تفضل تفكرها وتضحك عليها، ومكنتش أعرف إنها هتقلب الدنيا كلها، فقولت بلاش كمان أضيع فرحتها، بعد ما ضاع حلمها إنها تكون إعلامية.
وعن كواليس المفاجأة، توضح: أنا اللي فكرت فيها، عشان عارفة إن بنتى لما بتقع في محنة ونواجها بضحك، بتخرج منها بسرعة، وعشان كدة فرحت وفضلت تضحك هي وأصحابها، وخصوصا إنها كانت فاكرة إنى مش هعملها حاجة في عيد الميلاد عشان نزلت في التاريخ.
وتابعت: نزلت قولتلها هروح أجيب حاجات من السوق، ورحت للحلوانى، وكنت حجزها قبلها بيوم، نزلت جبتها إمبارح وفرحت جدا، وقولتلها لسه لما تفتحي التورتة تفرحي أكتر، وفعلا فرحت جدا بيها.
