الخميس 28 مارس 2024
المشرف العام
محمود المملوك
رئيس التحرير
مروان قراعة
المشرف العام
محمود المملوك
رئيس التحرير
مروان قراعة

ميادة صنايعي كهربائي: بحب أعمل حاجة ماحدش عملها.. وبشتغل 12 ساعة في اليوم

تعمل ميادة محمد مسعد البالغة من العمر 30 عامًا من بورسعيد، وحاصلة على دبلوم صنايع قسم الإلكترونيات والكمبيوتر، في مجال تصليح الأجهزة الكهربائية وتحديدًا في صيانة البوردة والكمبيوتر واللاب توب، ونجحت في تصليح العديد من الأعطال التي عجز الصنايعية الرجال عن إصلاحها، وبدأت أن تعمل منذ أن كانت في الصف الثاني لها في الدبلوم في إحدى محلات تصليح الأجهزة.

وقالت ميادة محمد مسعد: أنا أصلًا بحب الشغل عامة بس أول حاجة اشتغلتها هي صيانة الكمبيوتر ومشتغلتش حاجة غيرها وماعرفش حاجة غيرها، اشتغلت من سنة 2007 لحد دلوقتي ومنهم 11 سنة كنت شغالة في محل في شارع بني سويف وكان ليا أسمي وشغلي اللى الناس عرفوني منهم.

وأضافت ميادة محمد مسعد أنها بسبب متطلبات الحياة فتحت محل خاص بها في شارع بورفؤاد، وقالت: كان المشوار بعيد عليا جدًا عشان أنا ساكنة في حي الزهور فقفلت المحل بعد نحو 6 شهور بسبب ظروف المعدية والشتا.

وأشارت ميادة محمد مسعد أنها كانت تلعب الكرة في فترة ما بأحد النوادي، ولكن أتصل بها الأستاذ سيد صاحب المحل الذي تعمل به الأن وقال لها: أنا محتاجك في الشغل معايا، فقالت له ميادة: أنا مش فاضية عشان موسم الكورة لسه مخلصش لما افضى هجيلك، وبالفعل ذهبت له ميادة وهي تعمل معه الأن منذ 4 أشهر.

وعن لعبها للكرة قالت ميادة محمد مسعد: أنا بلعب كورة من وأنا عندي 11 سنة ولعبت في أندية كتير زي مركز أندية الزهور والمصري القاهري ونادي المعارف ومنتخب السويس اللي انا موجودة فيه دلوقتي وهنلعب السنادي ممتاز.

وعند سؤالها عن توفيقها ما بين عملها بالأجهزة الكهربائية ولعب الكورة قالت ميادة محمد مسعد: الموضوع صعب لأني مباخدش أجازة خالص، لأني من يوم السبت ليوم الأثنين بكون في المحل وبكون في السويس من يوم الثلاثاء ليوم الجمعة اللى برجع فيه بورسعيد وبنزل الشغل تاني يوم السبت على طول.

وأوضحت ميادة محمد مسعد أنها تميزت في عملها لكونها بنت وهذه المهنة معروفة بالرجال، ولأنها تصلح أشياء صعبة بدقة شديدة جدًا فقالت: كل حاجة بتيجي من الممارسة والخبرة ولو في حاجة أنا مش عارفة أعملها بفضل وراها لحد ما افهم واصلحها، وفي ناس كتير جابولي شغل مش عارفين يعملوه عشان اصلحه وعملته فعلًا، لأني بحب اعمل حاجة ماحدش عملها.

أما عن التحديات التي تواجهها ميادة محمد مسعد فقالت: بفضل في الشغل نحو 12 ساعة وساعات اتغدى وساعات لا وطبعًا ده بيجي على صحتي وكفاية القاعدة على الكرسي اللي بتتعب ضهري جدًا، وبيبقى صعب عليا لما اروح الساعة 12 أو 1 بليل.

وأشارت ميادة محمد مسعد أنها تطمح لتحقيق احلامها في مجال الصيانة ومجال الكورة فقالت: نفسي أوصل مع فريقي منتخب السويس لمركز كويس في الممتاز واكسب حكم دولي في اختبار التحكيم اللي هقدمه قريب، وبالنسبة للصيانة عاوزة اعمل حاجة لنفسي ويبقى ليا أسمي ووضعي زي شركة صيانة أو مبيعات خاصة بيا.

ووجهت ميادة محمد مسعد رسالة فقالت: الواحد ربنا بيديله على قد تعبه فأنت اتعب وسيب الباقي على ربنا وهو هيبعتلك رزقك عشان ربنا مبينساش حد، ووجهت رسالة خاصة للبنات: أنتي تقدري تعملي أي حاجة الولاد مايعرفوش يعملوها، وياريت كل البنات تتعب وتشتغل على نفسها وتتعود على ضغط الشغل عشان تقدر تواجه.