تعليق عمرو أديب على واقعة إصابة سائق قطار أسوان بالحجارة: مشوفتش الظاهرة دي إلا بمصر
علق الإعلامي عمرو أديب، على واقعة إصابة سائق قطار أسوان بسبب رشقه بالحجارة من بعض الصبية خلال رحلته: مصر هي البلد الوحيدة في العالم اللي بيتم فيها استهداف سائقين القطارات بالحجارة، أنا مشوفتش الظاهرة دي إلا في مصر، ولم أفهم طول حياتي الإعلامية الممتدة لعشرات السنين السبب في ذلك.
وأضاف أديب، خلال برنامجه الحكاية، المُذاع عبر فضائية mbc مصر، مساء الأحد: إيه الهدف إنك تضرب سواق القطار بالطوب، دول مش أطفال دول قناصة، ده لو معاه بندقية بمنظار مش هيعرف يصيبه في قلبه بالشكل كده، السواق اتصاب في صدره وكان ممكن يموت فيها، متسائلًا: إيه العادة المهببة دي وإيه المتعة في إننا نرشق السواقين بالحجارة؟.
وتابع مقدم الحكاية: إيه ذنب الراجل الغلبان اللي نازل يشتغل في ظروق صعبة جدًا يحصله كده، الإصابة دي لو في عينه والراجل ده وقع أو تعرض للإغماء هيحصل إيه؟ طبعًا هتحصل كارثة محققة لهذا القطار.
وناشد الإعلامي عمرو أديب: أرجوكم يا جماعة وده أغرب طلب ممكن يطلبه إعلامي في العالم، متضربوش سواق القطر بالحجارة.
