طردهم صاحب العقار.. سيدة بـ النهضة تستغيث: عاوزة سكن قبل الشتا عشان المطرة هتبهدلنا
طرد صاحب عقار بمنطقة النهضة، أسرة كاملة من منزلهم منذ 3 أشهر، وذلك لعدم قدرتهم على دفع الإيجار.
وقالت السيدة هدى عبد اللطيف: أنا بقالي 3 شهور نايمة في المدخل ومش لاقية سكن ومش معايا فلوس ادفع أي إيجار، أنا عاوزة أي سكن ليا أنا وولادي وجوزي.
فيما أضافت هدى: جوزي بيتشغل يوم و10 لا، وأبني تعبان ولسانه تقيل وعايزاله أي علاج عشان يقدر يتكلم.
كما قال الزوج أحمد إبراهيم: أنا بشتغل نجار يوم شغل يوم لا وماليش تأمين، وبقالنا 3 شهور عايشين تحت السلم امبارح اتبهدلنا من المطرة غرقتنا، وعشان مدفعناش الإيجار شهر فصاحب البيت طردنا، ومعايا ولادي عمر وأسماء وربنا يعلم بحالنا.
وأوضحت الزوجة هدى: بستأذن الجيران عشان اخش الحمام وساعات بروح حمام الجامع، ومش لاقية حتى أكل والجيران هما اللي بينزلولي أكل ليا أنا وعيالي وجوزي.
وطالبت هدى عبد اللطيف بتوفير سكن لها فقالت: أنا طالبة مساعدة وعاوزة أي سكن ليا أنا وجوزي وعيالي قبل الشتا عشان المطرة هتبهدلنا وهتبهدل حاجتنا، مش لاقيين أي حتة نقعد فيها حتى الجيران زهقوا من قعدتنا تحت السلم وقالولنا خدوا حاجتكوا وامشوا بدل ما نبلغ عنكوا الحكومة.
