شاب فقد قدمه بالسويس يستغيث بالسيسي: أنا محتاج شقة ووظيفة عشان أعيش

يعاني الشاب محمد صابر، البالغ من العمر 26 عامًا، وهو من محافظة السويس، من صعوبة معيشته، وذلك بعد أن فقد أحد قدميه في حادث منذ 4 سنوات، ومن بعدها عاش وحيدًا دون عائلته في الشارع، وظل يجاهد من أجل الحصول على الرزق الحلال.

في نفس السياق، قال محمد صابر: أنا وقعت من الدور الثالث وفقدت رجلي وركبت طرف صناعي، والدنيا صعبة معايا وبجمع البلاستيك من الشارع في شوال عشان مش عايز أمد إيدي لحد.

كما أوضح الشاب محمد أنه يبيع هذا البلاستيك الذي يجمعه فقال: البلاستيك ممكن يعمل معايا 10 أو 15 جنيه، واديني عايش وباكل وبشرب بيهم وبنام في الشارع، وآخر مرة نمت فيها على سرير من سنين.

ووجه محمد استغاثته قائلًا: أنا بطالب الرئيس السيسي أنه يلحقني عشان أنا تعبان، وبقالي 4 سنين في الشارع، أنا لوحدي وماليش حد والدتي متوفية ووالدي متجوز وقاعد في الشرقية بعيد عني ولما بروحله بيمشيني، وإخواتي كل واحد في حالهم وماحدش ليه دعوة بيا.

في هذا الصدد، أضاف الشاب محمد: أنا بقول للرئيس انا ابنك وتعبان ومتبهدل في الشارع وماليش حد، أنا محتاج شقة أتلم فيها ووظيفة عشان أعيش زي ما أي شاب عايش وأشوف واحدة بنت حلال أتجوزها.