محمد دياب يرد على شريف منير بعد مهاجمته فيلم ريش: كلام خطير من فنان كبير
رد المخرج محمد دياب، على الانتقادات التي طالت فيلم ريش، بعد عرضه في مهرجان الجونة السينمائي بدورته الخامسة، حيث وصف الفيلم من البعض بأنه مسيء لمصر، كما هاجمه عدد من الفنانين مثل شريف منير.
وكتب محمد دياب عبر حسابه الشخصي بموقع التواصل الاجتماعي فيس بوك: كلام الأستاذ شريف منير إن الجوايز اللي خدها فيلم ريش هي مؤامرة من الغرب على مصر، كلام خطير جدا، خاصة أنه من فنان كبير.
أضاف محمد دياب: هتكلم من خبرتي كشخص عضو لجنة تحكيم في مهرجان كان، وعضو في أكاديمية الأوسكار: قولًا واحدًا مفيش إنسان لا بالتلميح ولا بالتصريح عمره ما بيحاول يأثر على اختيارات لجان التحكيم، واللي أعضائها بيتكونوا من فنانين مميزين من أنحاء العالم، إدارة أي مهرجان دورها بينتهي باختيار الأفلام المشاركة ونقطة، ويسأل في ذلك الفنانين اللي كانوا أعضاء لجان التحكيم في المهرجانات الثلاثة الكبرى زي هند صبري ونيللي كريم ومحمد حفظي.
تابع دياب: طب ليه الأفلام اللي بتروح مهرجانات بتبقى عن الفقراء أو عن المشاكل، الأفلام المستقلة في العالم كله، هي الأفلام اللي خارج منظومة الإنتاج التجارية، يعني الأفلام اللي مش لاقيه إنتاج ودي بتبقى دايما الأفلام اللي عن المهمشين أو الناس اللي ملهاش صوت، وبما إنها أفلام مش متوقع منها تجيب فلوس فبيبقى عند صناع العمل الجراءة إنهم يعملوا اختيارات فنية جريئة وده بيخليها مغرية للمهرجانات اللي بتدور على سينما جديدة ومختلفة.
المخرج محمد دياب أضاف أيضا: سنة 2019 الفيلم اللي كسب البالم دور هو شوب ليفترز الياباني، وسنة 2020 اللي كسب نفس الجائزة هو باراسيت الكوري، وبعدها اكتسح الأوسكار، الفيلمين عن العشوائيات في دول عالم أول وبلادهم احتفت بالفيلمين وبصناعهم بالرغم من إن العشوائيات نسبتها في الدولتين لا تذكر.
فيلم ريش
يعد فيلم ريش، هو أول فيلم روائي طويل من إخراج عمر الزهيري، وشاركه تأليفه السيناريست أحمد عامر، من إنتاج محمد حفظي، وحرص عدد من الفنانين على مشاهدة الفيلم في عرضه الأول في مصر، ضمن الدورة الخامسة لمهرجان الجونة، مثل: يسرا، محمد فراج، بسنت شوقي، مايان السيد، كريم قاسم، منة شلبي، إيناس الدغيدي، كريم محمود عبدالعزيز.
