تلميذ يطعن زميله بسكين في مدينة نصر.. والأخير: عشان رفضت اديله الساندوتشات
شهدت إحدى المدارس في منطقة مدينة نصر، تعدى تلميذ على زميله بسلاح أبيض “سكينة”، بسبب رفض المجني عليه إعطاء ساندوتشاته إلى الطفل المتهم.
وقالت والدة الطفل نور المجني عليه: اللي أنا عرفته من ابني إن زميلة جه يرخم عليه، وياخد ساندوتشاته، ونور ابني رفض، راح الولد طلع السكينة من شنطته، وضرب بيها ابني في ايده، والضربة اتسببت له في قطع في الوتر الأوسطي، وتهتك في الأعصاب حسب تشخيص الدكتور.
وأكملت والدة الطفل نور حديثها: الدكتور بعد ما خيطله الجرح، وعمل اختبار على صوابع ابني، اكتشف إن الإحساس مش واصلها ومش بتتحرك، قالي هنعمل عملية استكشاف لإن الموضوع خطير.
وعن الإجراءات القانونية التي اتخذت مع الطفل الجاني، قالت أم الطفل نور المجني عليه: علمت إن النيابة جت أخدت الطفل وحققت معاه وتم إخلاء سبيله، وماعنديش فكرة إذا هيتم معاقبة الطفل أو لأ.
ومن جانبه، أوضح الطفل نور تفاصيل الواقعة، قائلًا: كان عندنا حصة أنشطة وأنا استأذنت المدرسة إني أطلع أفطر، وكان الولد بيلعب بالسكينة وبيضايق بيها زمايله، وبيخبطهم في رجلهم، ودي مش أول مرة أشوف معاه السكينة في المدرسة.
واستكمل الطفل نور حديثه: جه قالي هات الأكل بتاعك، رفضت وقلتله لأ ده الفطار بتاعي، وبدأ بعدها يتخانق معايا، ولما زقيته بعيد عني راح جاب السكينة إلى معاه وكان عايز يضربها في زوري، لكن الضربة جت في إيدي وانا بدافع عن نفسي.
وأشار الطفل نور، إلى أنها ليست الواقعة الأولى التي يتم الاعتداء عليه من نفس الطفل، فقد أصابه بجرح في الرقبة منذ عدة أيام، قائلًا: كان فرحان إنه عورني وبيقول لزمايلنا في الفصل أنا اللي عورته.
