عصام عبد الفتاح: احتواء اللاعبين علم من علوم التحكيم
علق عصام عبد الفتاح رئيس لجنة الحكام بالاتحاد المصري لكرة القدم عن انتقاد طاقم تحكيم مباراة الأهلي والزمالك الأخيرة، في مسابقة الدوري الممتاز والتي انتهت بفوز الأهلي 5-3.
وقال عبد الفتاح في تصريحات تلفزيونية: محمد عادل تكلم في المداخلة عن إدارة المباراة وإزاي يحتوي اللاعبين، ده علم من علوم التحكيم ومحاضرة مهمة مع الحكام.
وأضاف عبد الفتاح: الحكم زي الدكتور لما بيلاقي المريض درجة حرارته عالية لازم يعالج اللاعب، لما الحكم يلاقي الرتم بيعلى في أرض الملعب لازم يسيطر على اللقاء عشان يتعامل معهم بشكل لا يفسد المباراة.
وواصل رئيس لجنة الحكام: ياريت الناس اللي مش بتفهم في التحكيم تسال يعني إيه إدارة مباراة واحتواء لاعبين، احتواء المباراة دي إنه يستخدم شخصيته وتحكيمه العادل عشان يسيطر على المباراة، لكن مش إنه يجامل أو يتغاضى عن حاجة.
وتابع عصام عبد الفتاح: محللين التحكيم في قناة أون ونادي الزمالك وقناة الأهلي كلهم أشادوا بالتحكيم، وصلنا لمرحلة إن البعض أصبح يكره نجاحاتنا، وبصراحة شايف إن الناس عاملين تركيز غير عادي على التحكيم وغير عادل على الإطلاق.
واختتم رئيس لجنة التحكم: إحنا ماشيين في طريقنا، وشايف إن محمد عادل عمل مباراة ممتازة، بشهادة الجميع بما فيهم محللي القنوات التلفزيونية.
