زيادة عشوائية في الفواتير وأزمات في تطبيق الشحن.. شكاوى عملاء بتروتريد من سوء خدمة الغاز لا تنتهي
اشتكى عدد من عملاء بتروتريد شركة الخدمات التجارية البترولية، العاملة في مجال توصيل الغاز الطبيعي للمنازل، وتعددت الشكاوى بين عدم إمكانية استخدام تطبيق الشركة لتسجيل قراءة الغاز الطبيعي، واحتساب الشركة لمبالغ إضافية على استهلاك الغاز الطبيعي المنزلي، دون وجه حق.
اشتكت إحدى عميلات الشركة تدعى هيام أحمد، من تطبيق شحن عداد الغاز مسبق الدفع، عبر الهاتف المحمول، الذي يسمى بتروشحن، قائلة في التعليقات على الصفحة الرسمية للشركة بموقع التواصل الاجتماعي فيسبوك: ياريت تفيدنا هو للشحن فقط، ويستمر الغاز ولا له مده وينقطع، عندي رصيد وشحن الكارت في الشركة، وقطع عندي الغاز، وليا عندهم رصيد كبير، وتكرر هذا الأمر معي وشركة بتروتريد قالت إحنا للفواتير بس حاليا مع البرنامج ده يا ترى إيه الحال؟
واشتكت عميلة أخرى تدعى إيناس، وعميل آخر يدعى أحمد مغاوري، من ارتفاع القراءة في الفاتورة أعلى مما هو مسجل في العداد، وقالت إيناس في شكواها في التعليقات على الصفحة الرسمية للشركة بموقع التواصل الاجتماعي فيسبوك: أنا كنت قافلة الشقة ولما رجعت المحصل سلمنّي الوصولات وتفاجأت أن القراءة اللي في الوصل أعلى من العداد، مضيفة: يعنى انتو بتحطوا قراية من عندكم؟ المحصل قال لي هعمل لك شكوى يا فندم وبقالي شهرين بدفع 12 جنيه والمحصل بيجى يشوف القراءة بيلاقيها إنها لسه موصلتش القراءة اللى أنتم حطينها من عندكم، متابعة: جيت أدخل الشهر ده القراءة على النت لقيت مهزلة بمعنى الكلمة لقيتكم نزلتوا القراية حوالى 51 مترا اللي هو هرجع أدفع اللى أنتم كنتوا حطينه من عندكم للمرة التانية.
وكذلك اشتكى العميل الذي يدعى أحمد مغاوري قائلا: ياريت تحلوا مشكلة الزيادة العشوائية في القراءة اللي بتتحط، إجباري كل شهر لازم يبقي فيه استهلاك، وده كلام مش سليم حتى بمرور المحصل يقول مقدرش أسجل نفس قراءة الشهر اللي فات أتمنى يبقي في حل أو تعرفونا الحل أي.
وقال إبراهيم الشيمي: ياريت تهتموا بمشاكل العملاء واعملوا على حلها واتقوا الله فى الفلوس اللي بتاخدوها حرام عليكم.
واشتكى العميل لدى بتروتريد ويدعى إسلام تمام عبر فيسبوك قائلا: برنامج الدفع سيء جدا، خصم المبلغ ولم يتم تسجيل الدفع، وللأسف مفيش اي طرق للتظلم أو الإبلاغ زي أي مكان فيه دفع الكتروني، مضيفا: منصحش أي حد يدفع الكتروني لأن البرنامج سيء جدا وفيه أخطاء، ولما بيحصل مشكلة مش بيبقى أمامك إلا أن حضرتك لازم تقطع مشوار لحد شركة بتروتريد وياعالم إيه اللي هيحصل بعد كل الدوخة.
واشتكى أحمد طارق قائلا: أنا عندي مشكلة، البرنامج سحب الفلوس ولم يتم الشحن، محتاج أعرف الفلوس ترجع ليا ازاي؟
