رئيس التحرير
محمود المملوك

شطة لـ القاهرة 24: الأهلي سيفقد نجومه الدوليين رغم وعود مجاهد

النادي الأهلي
النادي الأهلي

علق عبدالمنعم شطة، عضو اللجنة الفنية بالاتحاد الإفريقي سابقًا، على تصريحات أحمد مجاهد رئيس اللجنة الثلاثية، بشأن خوض منتخب مصر لكأس الأمم الإفريقية بكامل نجومه، ومشاركة الأهلي في كأس العالم للأندية بكامل نجومه أيضًا.

مجاهد يحل أزمة لـ الأهلي وكاف وفيفا

وقال شطة في تصريحات خاصة لـ القاهرة 24: الواضح إن مجاهد تحدث مع كيروش بخصوص اللاعيبة اللي هتنضم للمنتخب، لأن بكلامه حل مشكلة لـ فيفا وكاف والأهلي، بس هل كيروش موافق؟ احنا عايزينه يطلع يقولنا.

وتابع: لو مجاهد عمل كده يبقى حل المشكلة، هو عنده ثقة في كيروش، وارد إنه قاله مش هاخد لاعيبة الأهلي، وممكن يكون قصد إن الأهلي هيكون بنجومه بس يقصد دون اللاعبين المستدعيين المنتخب، والحل الأقرب وسطنة الأمور بعدم انضمام عدد كبير من لاعبي الأهلي للفراعنة.

الأهلي يشكر مجاهد

وعن خطاب شكر الأهلي لاتحاد الكرة، قال: أقل حاجة يعملها النادي الأهلي توجيه الشكر، لأن أحمد مجاهد حل أزمة كبيرة كانت هتخسر الأهلي كتير، وقرار جريء جدًا منه.

وأضاف: الأهلي لازم يرفع القبعة لاتحاد الكرة، لأن الحل ده كان آخر حل ممكن حد يفكر فيه، والأهلي مكانش يعرف إن الحل سهل كده، احنا بنشكر أحمد مجاهد، بس هل هيكون موجود ولا لأ؟، لو مش موجود هيكون ايه الموقف من المجلس الجديد وكيروش.

الأهلي يفقد نجومه الدوليين

وعن بند استدعاء المحترفين، أضاف شطة: أي بطولة إفريقية لازم كل منتخب يستدعي لاعبيه المحترفين، واللاعب عنده الاختيار يقبل أو يرفض بصفته لاعب محترف.

وأردف: الأهلي لو رفض يرسل لاعبيه للمنتخبات الوطنية، هيكون في عقوبة على النادي طبقًا للائحة الاتحاد الإفريقي لكرة القدم، وإلا كان ممكن الأهلي يرفض، ووقتها الاتحاد المصري هيقدم شكوى لكاف ويوقف اللاعيبة.

وواصل: الأهلي هيضطر ينسق مع كل لاعب هينضم لمنتخب بلده، عشان يكون موجود مع الفريق، بس الموضوع مش هيكون ملزم زي ما حصل مع اتحاد الكرة ولاعيبة الأهلي اللي هتنضم لمنتخب مصر، خاصة إن جميع الاتحادات الأخرى غير ملزمة بالتنفيذ.

واختتم: رغم حل اتحاد الكرة اللي يُشكر عليه، إلا إن الأهلي هيفقد الثلاثي المحترف بدر بانون وعلي معلول وأليو ديانج، وفي حال أن اللاعب منتخبه خرج من كأس الأمم، هيكون لسه قدامه وقت عشان يسافر وينضم لبعثة الأهلي وده هيخلي في إجهاد.