زوجة مصرية تطلب عروسة لزوجها.. وتؤكد: بيعاملني أحسن معاملة وهنرد على المنتقدين بدعوات الفرح
يا أهل الخير عاوزة مساعدة فى إيجاد عروسة لجوزي، بهذه الكلمات أثارت ثويبة صابر الجدل على مواقع التواصل الاجتماعي، حيث طلبت لزوجها عروس بها بعض الصفات، مثل إجادة الطبخ، الهدوء واللطف.
زوجة تطلب عروس لزوجها
البداية عندما نشرت ثويبة صورة تجمعها بزوجها على فيسبوك، وعلقت عليها: جوزى عايز يتجوز، أهم حاجة بتعرف تطبخ وست بيت، ومتكنش مهيبرة، واحدة هادئة ولطيفة، مش متقبله المزاج، أقسم بالله ما بهزر اللى عندها استعداد يا أهلا وسهلا.
وتابعت: هو راجل محترم بيصون العشرة، ده بجد مش تريقة، وحقيقي بيحب البيت والأسرة ونعم الراجل، وفى الـ 38 من عمره، بس ميبانش عليه، عاقل ورزين.
ثويبة صابر ترد على المنتقدين
تواصل القاهرة 24 مع ثويبة، التي أكدت أنها لم تقصد ركوب التريند من وراء هذا المنشور، بل كان كل هدفها تحقيق طلب زوجها وإيجاد عروسًا له.
تقول ثويبة: زوجي طلب مني وقولتله هنزلك بوست، وديه حياتي وده زوجي، محدش له دخل ما دام مرضتش الوضع على حد.
وأضافت لـ القاهرة 24: وافقت على طلب زوجي لأني مؤمنة بالتعدد، ومعنديش مشكلة مع الأمر، ولو مش مقتنعة مفيش حاجة هتمنعني إني أطلق، حتى لو الحب.
وأكملت: زوجي حنين، طيب، أصيل، مهذب، صبور، خلوق، سند وداعم، وقبل أي شيء أب وأخ وصديق وطبيب لكل قلق وضغط.
وأكملت حديثها: كلام المنتقدين مغيرش رأيي، بالعكس هصر أكتر ولن يغير كلامهم شيء، وزوجي قرر ميردش عليهم، وهنرد بدعوات الفرح.
وأوضحت أن زوجها يعاملها أفضل معاملة، لكنها مؤمنة بالتعدد، فقالت: ياريت الناس ترجع لكتاب الله تاني، لأن الأخلاقيات انحدرت بشدة، وأنا طلبت صفات معينة في العروس مش فيا عشان نكمل بعض، إحنا مش عايزين خدامة، إحنا عايزين ملكة في بيتها، وفي بنات وافقت على طلبي.
التعدد شرع الله ولا يخالف الكتاب والسنة
تتابع ثويبة: ربنا أتاح لزوجي ده، كل واحد فينا بيعمل اللى عليه، وهو عاوز حاجة مش عندى، ليه أسيب حاجة تانية، عشان أحاول أعمل حاجة مش هعرف أكونها أو أمنعه أنه يأخذها.
وردت ثويبة على المنتقدين: مش مستنية حد هيقولى حياتى هتمشى إزاي، مش مشكلتى إن شايفين التصالح مع النفس والوضوح والتفاهم مشكلة وأن كده الحياة وقفت، ما دام لم أفعل ما يغضب الله ولا يخالف كتاب وسنته، فلتطبق الأفواه وتلجم الألسنة.
