المستكاوي: كيروش ليس انهزاميًا.. وأعترض على أن يكون حلمنا هو الوصول لكأس العالم
علق الناقد الرياضي حسن المستكاوي على تصريحات كارلوس كيروش اليوم، قائلًا: كارلوس كيروش ليس انهزاميًا.. وأنا معترض أن يكون حلمنا هو الوصول لكأس العالم والاتحاد اتعاقد معاه عشان كده.
تابع المستكاوي، في مداخلة هاتفية خلال برنامج "كلمة أخيرة" الذي تقدمه الإعلامية لميس الحديدي على شاشة ON، قائلًا: كيروش عنده حق لما قال إن مفيش مدرب قبل بطولة يقول هاخدها وهكسبها.. الكورة فيها نتائج غريبة ومتغيرة، ولو قال (هاخد البطولة) الناس هتهاجمه أكتر.
وأضاف الناقد الرياضي حسن المستكاوي: تصريحات كيروش ليس فيها عدم اهتمام ببطولة كأس الأمم.. وهو مهتم جدًا بالبطولة زي ما كان مهتم قبل كده.
مفيش حد بيحاسب حد
وعلقت الإعلامية لميس الحديدي، قائلة: "المدير الفني للمنتخب منه لربنا ومحدش بيكلمه! وفينجادا (الشبح الخفي) اللي بياخد 60 ألف دولار في الشهر بيعمل إيه؟، ليرد المستكاوي قائلًا: "اللي تعاقد مع كيروش أكيد قعد معاه وحدد الهدف، ومفيش حد بيحاسب حد.. والله لو فينجادا بيعمل حاجة محدش هيتكلم".
واستكمل الناقد الرياضي حسن المستكاوي: إحنا بقالنا 10 سنين مش بنلعب كورة كويسة، ولو بنلعب كورة كويسة الجمهور مش هيزعل لو خسرنا بطولات ومباريات. مضيفًا: شيء خطير جدا لما يتم تأجيل مباراة والمدير الفني للمنتخب ميكونش عارف كدة.. وجميع الاتحادات المصرية اللي تولت اتحاد الكرة مكانش عندها مشروع، والاتحاد الجديد لازم يعمل مشروع. متابعًا: بنروح كأس العالم ومبنلعبش كورة؛ لأن مفيش مشروع كروي لدى اتحاد الكرة.
