نيللي كريم عن السينما النظيفة: البوسة ممكن تبقى حلوة في حالة واحدة
تحدثت الفنانة نيللي كريم، عن مفهوم السينما النظيفة من وجهة نظرها، مشيرة إلى أن المشهد يعتمد على كفاءة المخرج والكادر.
وقالت نيللي خلال لقائها في برنامج بصراحة مع: أنا مع السينما الحلوة ميهمنيش نظيفة ولا لا حتى لو فيه مشاهد حب المهم القصة ومين المخرج ووجهة نظره أيه، وأنا حظي حلو أني اشتغلت مع مخرجين كتير عينهم حلوة زي كاملة أبو ذكرى في فيلم يوم للستات وفيه مشهد لإلهام شاهين وفيه علاقة غرامية بتحصل، ومع ذلك أنتي هتقعدي تتفرجي على الفيلم ومش مضايقة والبوسة ممكن تبقى حلوة أو وحشة حسب الكادر.
وواصلت: زي الأفلام القديمة بتتفرجي على مشاهد الحب وأنتي فرحانة وبتضحكي وعينك فيها لهفة، والإخراج وجهة نظر معتمدة على المخرج وفيه مخرجين مقدرش أشتغل معاهم ومعنديش ثقة فيهم، وفيه مخرجين أشتغل معاه وانا مغمضة.
وأضافت نيللي: وأنا عملت فيلم 678 بيتكلم عن التحرش وكل المشاهد محدش لمس حد، ومع ذلك المعنى وصل للمشاهدين، والفيلم كسب جوائز كتير أوي وأتعرض في أميريكا وأسبانيا والستات وهما بيتفرجوا بيقولوا أنا حصلي كدا، دا سبب جمال الإخراج أنك تعمل أي حاجة بس المهم العناصر تكون متكاملة، الجرأة ليها حدود وهيبة معينة.
فيلم 678
وفي سياق متصل، فيلم 678 من إخراج وتأليف محمد دياب، وشارك في المسلسل عدد كبير من الفنانين منهم باسم سمرة، هند صبري، نيللي كريم، أحمد الفيشاوي، ماجد الكدواني، وبشرى.
ويتناول الفيلم قضية التحرش الجنسي من خلال ثلاث نساء من طبقات اجتماعية مختلفة، وتتصاعد الأحداث عندما يحاولن الدفاع عن نفسهم من التحرش.
فيلم يوم للستات
جدير بالذكر، فيلم يوم للستات من إخراج كاملة أبو ذكرى، وتأليف هناء عطية، وشارك في الفيلم العديد من الفنانين، منهم إلهام شاهين، فاروق الفيشاوي، محمود حميدة، هالة صدقي، وناهد السباعي.
وتدور أحداث الفيلم حول ثلاث سيدات من خلفيات اجتماعية مختلفة، وهم عزة وليلى وشامية يجتمعن حول حمام سباحة بالقرب من إحدى المناطق الشعبية، وتروي كل واحدة منهم قصة حياتها، ومحاولتها للتغلب على الأزمات والتحديات التي تواجهها.
