المخرج كريم الشناوي: سعيد بتأجيل وخروج لام شمسية من رمضان 2022
علق المخرج كريم الشناوي على تأجيل مسلسله الجديد لام شمسية الذي تلعب بطولته الفنانة منى زكي، وخروجه من ماراثون رمضان 2022، بسبب إصابة عدد من صناع المسلسل بفيروس كورونا.
خروج مسلسل لام شمسية من رمضان 2022
وعبر كريم الشناوي عن رأيه في تأجيل المسلسل من خلال بعض العبارات، التي كتبها عبر حسابه الشخصي على موقع التواصل الاجتماعي فيسبوك، قائلًا: بعد خبر تأجيل المسلسل امبارح، جالي تليفونات ورسائل كتير لأصدقاء بيطمنوا وبيدعموا القرار.. أنا بس حابب أوضح إني مبسوط بالقرار وممتن لكل الشركاء في العمل اللي حطوا مصلحة المشروع قبل مصلحتهم من أول المنتج وشركة الإنتاج والأساتذة الممثلين والأساتذة رؤساء الأقسام وكل الشركاء في العمل اللي بذلوا مجهود كبير في الفترة اللي فاتت ولسه عندهم الحماس لبذل مجهود أكبر لما نستكمل العمل.. احنا عمرنا ما بنضمن النتيجة لكن دورنا نوفر أفضل ظروف ممكنة للشغل والحقيقة دي القناعة اللي عند كل فريق العمل ودي حاجة تفرح جدا.
وأضاف كريم الشناوي: حابب كمان أشكر فريق الإخراج اللي أنا حقيقي محظوظ إني بشتغل معاهم، واللي كانوا شريك أساسي في كل نجاح حققنا قبل كده، وامبارح كنت ممتن جدا إنهم حولوا قرار صعب زي ده لقرار سهل ومفهوم ومنطقي حتى لو بيلخبط حساباتهم الشخصية، ودي حاجة بتؤكد فخري واعتزازي بفريق الإخراج اللي بشتغل وسطهم.
وتابع مخرج لام شمسية: حاجة أخيرة وشخصية، امبارح كانت الذكرى السنوية الأولى لوفاة عمتى مها الشناوي، وقعدت أفتكر كل الكلام اللي كانت بتحكيهولي عن الصناعة وازاي هنفضل طول الوقت قدام خيارات صعبة ولازم نقدر عليها، وفي نفس الوقت نحافظ على شغفنا للشغل اللي بنعمله.. فكنت مبسوط إنها حاضرة ومؤثرة في يوم زي امبارح.
