وليد سليمان يتحدث عن دعم الجماهير ويكشف أغلى بطولة في تاريخه مع الأهلي
علق وليد سليمان، قائد النادي الأهلي عن الفوز على الهلال السعودي، والحصول على برونزية كأس العالم للأندية، وحرص على التحدث عن بيتسو موسيماني، وسلط الضوء على أغلى بطولة في تاريخه مع المارد الأحمر.
وليد سليمان يتحدث عن حصول الأهلي على برونزية المونديال
وقال وليد سليمان في تصريحات تلفزيونية: الحمدلله بس إحنا كنا متوقعين وكنا متفقين مش هنرجع إلا بميدالية، ومحدش توقع نتيجة المباراة بس إحنا كنا مركزين ودايما بنلعب بقلبنا والنتيجة دي بتاعة ربنا.
وأضاف الحاوي: إحنا من بداية المباراة وصلنا للجون كذا مرة، كان عندنا رغبة الفوز وظروف الماتش خليت الإسكور كده، حالتين الطرد ده غير إن احنا كنا مركزين.
وأكمل وليد سليمان: دي ظروف ماتش وحالة اللاعيبة كمان طلعوا من ماتش قوي جدًا ضد تشيلسي، احنا كنا مركزين أوي وكان عندنا رغبة إننا نفوز ونرجع بالمركز الثالث.
وليد سليمان: أتمنى الجمهور يكون راضي عني
وتابع وليد سليمان: الحمدلله الاستاد كان مليان بالجمهور، وكان عندنا حافز نحقق انجاز حتى الجيل الذهبي محققش الميدالية البرونزية مرتين ورا بعض، الجمهور كان حاجة تفرح النهارده والتوقيت كان كويس وانا بشكر الجمهور وأتمنى يكون راضي عني.
وواصل: الطبيعي إن كل واحد عايز لاعب معين يلعب، جمهور النادي الأهلي مبيحبش الخسارة والتعادل عنده خسارة برضه، وعشان كده الأهلي جمهور يختلف، شخصية لاعب الأهلي زي الجمهور مبيحبش الخسارة، وعشان كده النادي رقم واحد.
وعن موسيماني، أوضح الحاوي: جاي عنده طموح وعارف إنه جاي الأهلي أكبر نادي في الشرط الأوسط وعنده قاعدة جماهير كبيرة، عايز يعمل لنفسه اسم، وعنده أهداف جاي يحققها مع الأهلي.
أغلى بطولة وهدف في تاريخ وليد سليمان
واختتم: كل البطولات غالية بس الأغلى بطولة دوري أبطال إفريقيا، اللي كانت بعد مجزرة بورسعيد مكناش بنلاقي ملاعب نتدرب عليها، وعشان كده سميناها بطولة الشهداء، وأغلى هدف عندي هدفي في الترجي التونسي في ملعب رادس.
