عرفوه بالحب

العلاقات بتتبني على 4 حاجات، الحب، الاحترام، الاحتواء، الأمان، ووقت ما أي ضلع من الأربعة بيختفي، بتبقى العلاقة على حافة الانهيار، زي البيت المبني على الرمل، أي شوية ريح أو مياه، قادرين يوقعوه أو يخلوه مش موجود خلال فترة صغيرة.

فالحب، بيكون هو البداية اللي بتشد أي اتنين لبعض، وبتكون البداية لأي خطوة بعد كدا، وبيكون هو البنزين اللي بيحرك الاتنين أو بيشدهم بمعنى أدق ناحية العلاقة وبيخليهم متحمسين للعلاقة دي، حتى لو كلمة "بحبك" اختفت مع الوقت، أو بقت بتتقال بس في المناسبات كنوع من الـ "كل سنة وأنت طيب"، لكن وقت الجد بتتحس أكتر من لما بتتقال.

والاحترام، هو زي ما قال فؤاد المهندس في مسرحية "سك على بناتك": "أحلى حاجة في أمكم، كانت تديني برستيجي قدام الناس، وأول ما نرجع، تاخده مني تاني على طول"، لأن أوقات كتير الطرفين بينسوا، أو بيتناسوا أن صورتهم هما شخصيًا من صورة شريك حياتهم، ولو شريك حياتهم ظهر بشكل مش حلو، هما برضه صورتهم الشخصية مش هتكون حلوة ولا كويسة.

أما عن الاحتواء، فأحب أقولك إن حواء في الأساس لما اتخلقت، اتخلقت علشان تكون "المعين النظير"، حتى حروف اسمها جاية من كلمة احتواء، سواء بتقدمه، أو سواء منتظراه من الراجل اللي قدامها، سواء في موقف غلطت فيه، سواء في لحظة تفكير سوا، سواء في قرار بتاخدوه سوا يخص حياتكم، في الحياة عمومًا الاحتواء بيكون مطلوب وبيكون حلو.

لكن لو كل دول اتوجدوا والأمان مبقاش موجود في العلاقة، أو حل محله مشاعر القلق والخوف والتفكير طول الوقت "أنا في أمان ولا لا؟"، هتبقى العلاقة مخيفة، وتبقى أكبر منطقة أمان في حياة الإنسان المفروض متحولة لأكتر حاجة بتخوفه وبيخاف منها، والأمان مش في الاعتداء الجسدي بس.

لأن المفروض كل راجل يفهم أن حواء لما اتخلقت اتخلقت من ضلع آدم، علشان تعرف أن مكانها جنب قلبك، وأمانها مسئوليتك، ولكن مش الأمان الجسدي بس المطلوب، لكن الأمان العاطفي، وأن كل طرف يحس في العلاقة أنه كافي في عين شريك حياته، وأنه حلو، وأنه لسة يستاهل الحب.