حمادة هلال: مفيش تعاون بيني وبين حمو بيكا.. ولو ركز في التمثيل هيكون زي طلعت زكريا
كشف الفنان حمادة هلال، حقيقة تعاونه مع حمو بيكا مؤدي المهرجانات، بعدما أشيع خلال الفترة الماضية أنه سيجمعها عمل فني، بعدما ظهر حمادة مع حمو في مقطع فيديو، كما قدم نصيحته لحمو بيكا.
وقال الفنان حمادة هلال، في حواره مع المذيعة أسما إبراهيم، ببرنامج حبر سري، الذي يعرض على قناة القاهرة والناس: مفيش تعاون ولا أي حاجة، أنا بحب حمو بيكا جدا وبحب خفة دمه جدا، هو دخل بيهزر وفاتح فيديو وبيقولي أغنية مش هقول للراجل لأ، وأنا شايف إن حمو بيكا لو ركز في التمثيل هينجح جدا، وهيكون زي أستاذ طلعت زكريا الله يرحمه، واللي كنت بعشقه.
كما أوضح هلال، خلال الحلقة أنه لا يوجد له منافس، في الوقت الحالي، قائلًا: أنا معنديش منافس، لأن في كذا واحد بيخاف يعمل حاجات غريبة، ومنافستي الوحيدة مع حمادة هلال، لأني مش هركز مع غيري، ونمبر وان ده بتاع الناس، والأحلى أن الناس تحطك في حتة لوحدك، والجرأة في إني ممكن أغني أغاني ملهاش علاقة ببعض.
حمادة هلال ينافس في رمضان بـ المداح 2
وعلى جانب آخر، يخوض حمادة هلال الماراثون الرمضاني 2022 بالجزء الثاني من مسلسل المداح، بعدما حقق نجاحًا كبيرًا من خلال الجزء الأول في رمضان 2021.
وجمع الجزء الأول من مسلسل المداح العديد من الفنانين، منهم حمادة هلال ونسرين طافش وأحمد بدير وحنان سليمان وخالد سرحان ومحمد عز ومحسن منصور وبسمة ماهر وغيرهم، والمسلسل كتابة وتأليف أمين جميل ووليد أبو المجد وشريف يسري، وتحت قيادة المخرج أحمد سمير فرج.
