رمضان صبحي لـ جمهور الأهلي: صعب أقولهم سامحوني.. اللي بيسامح ربنا
وجّه رمضان صبحي، لاعب فريق بيراميدز، رسالة إلى جماهير النادي الأهلي، وتحدث عن الثنائي الذي يرغب في اللعب بجوارهم حال الانضمام لصفوف نادي الزمالك.
رمضان صبحي: الخطيب أسطورة ومعرفش عن افتتاح الاستاد
وقال رمضان صبحي، في تصريحات تلفزيونية عن محمود الخطيب رئيس الأهلي: أسطورة طبعًا ودايمًا من ساعة ما بدأت بسمع عنه، هو أسطورة بتمنى له التوفيق، ووقت ما قررت إني همشي من الأهلي مكنتش أعرف إن يومها في احتفال بالتعاقد مع استاد جديد للنادي.
وواصل: طاهر محمد طاهر مش طرف في موضوع رحيلي عن الأهلي، إحنا من صغرنا متربيين مع بعض في المنتخبات الوطنية، ولحد دلوقت الصداقة مستمرة حتى بعد ما راح الأهلي.
رمضان صبحي: هلعب جمب شيكابالا وزيزو في الزمالك
وتابع رمضان صبحي: مفيش حد بيعوض غياب حد، كل لاعب بيبقى ليه طريقة لعبه وليه ستايله الخاص، ولو كنت لاعبًا في صفوف الزمالك، هكون حابب يلعب جمبي شيكابالا وأحمد زيزو، مضيفًا: مفيش حاجة اسمها صفقة القرن حتى لو كانت الصفقة قوية وهتعمل بوم.
رمضان صبحي لـ جمهور الأهلي: اللي بيسامح ربنا
ووجه رمضان صبحي لـ جمهور الأهلي: بتمنى لهم التوفيق الناس لما بتشجع بيكون في حماس، وأكيد الأهلي محتاج مؤازرة جماهيره دايمًا عشان يديله الدعم الكافي، وعمري ما هقول لجمهور الأهلي كفاية كده، واختتم: صعب أقولهم سامحوني.. اللي بيسامح ربنا.
