محمد نجاتي: حرام نقطع عيش حمو بيكا ونغرّبه.. وماعنديش مشكلة أشتغل معاه
تحدث الفنان محمد نجاتي، عن أزمة مطربي المهرجانات وعلى وجه أخص حمو بيكا، ورأيه في منعه من الغناء في مصر، مؤكدًا أنه لا يمكن إطلاق لقب مغني شعبي على بيكا، لكن يمكن أن يوظف على أنه مونولوجست أو مؤدي.
وقال الفنان محمد نجاتي، خلال حواره مع القاهرة 24: أنا شايف إن حمو بيكا يتوظف بـ أي حاجة يعني يتقال عليه مونولوجست، لكن مطرب شعبي دي تقيلة شوية مش أي حد يقدر يبقى مطرب شعبي، لأن الغناء الشعبي مش سهل خالص، إنما مقطعش عيشه خالص ومخليهوش يروح برا مصر ويتغرب علشان يدور على لقمة عيشه.
وتابع محمد نجاتي: حمو بيكا بيغني كلمات مظبوطة على إيقاع، لكن مفيش غناء ولا لحن، في ناس كتير أوي غنت وهما مبيعرفوش يغنوا، لكن بيعرفوا يقولوا اللي مطلوب منهم، يعني يتقال عليه مؤدي.
وأضاف محمد نجاتي: الغناء مش إني أقول يا عين يا ليل، الأستاذ محمود عبد العزيز غنى وهو مش مطرب، والأستاذ أحمد زكي، والأستاذ محمود ياسين، والأستاذ عبد المنعم مدبولي، أنا مع فكرة أنه بلاش تموت حمو بيكا للآخر، لكن صنفه في المكان اللي يقدر ياكل منه عيش.
أما عن تعاونه مع حمو بيكا، فقال: لو العمل هينفع يشيلنا إحنا الاتنين إيه المشكلة، لو العمل هيكون ليه شكل في النهاية ويعجب الجمهور ليه لأ، ويعني هو أنا عمرو دياب ولا تامر حسني ولا علي الحجار في الغنى؟، أنا بردو بغني على قد اللي ربنا صرفهولي في موضوع المزيكا.
أعمال محمد نجاتي
كما كشف الفنان محمد نجاتي، عن أولى تجاربه الغنائية قائلًا: أنا عشان أدخل مجال فني جديد لازم يكون بيتخطط له صح، وبيتسوق له صح، علشان ميتقالش إني دخلت وخلاص، وأنا هنزل أغاني ليا مفاجأة الصيف ده بإذن الله.
