ابنة حسن أبو السعود: أنا مش ضد المهرجانات.. أتمنى حمو بيكا ميغنيش تاني
قالت ابنة الموسيقار الراحل حسن أبو السعود، أنها تحب أغاني المهرجانات الشعبية، مشيرة إلى أنها تغير الحالة المزاجية للمستمع، وتدخله في حالة من البهجة.
وأضافت رنا حسن أبو السعود، خلال حوارها مع القاهرة 24: أنا مش ضد المهرجانات خالص، لأن بيجي وقت بتبقي عايزة تتجنني وتخرجي من المود، ولكن أنا ضد الكلام اللي مش لطيف ده لأن مينفعش ولادنا ياخدوا عليه، لأن ده مش الطبيعي ما بينا.
كما تحدثت عن مغنيين المهرجانات الشعبية قائلة: حسن شاكوش بالنسبة لي بيغني كويس، لكن الطبقة العالية أوي اللي بيغني منها دي بتبوظ حلاوة أنه بيعرف يعمل عرب، بتقلب بـ صداع، لكن لو هو نزل طبقتين كده وبدأ يغني لأنه بيعرف يغني، هيبقى كويس أوي، عمر كمال بيعرف يغني.
وتابعت رنا حسن أبو السعود، طالبة من مؤدي المهرجانات حمو بيكا عدم الغناء مرة أخرى قائلة: حمو بيكا أنا بحبه لأنه إنسان طيب، بس هو المفروض ميغنيش خالص، يعني نتمنى من الأستاذ حمو بيكا يسمع اللقاء ده وميغنيش تاني، لأنه بيتخانق في الأغنية، ولكن فيه كلام حلو بسمعه بيكون متألف حلو.
واستطرت: في النقابة بيدققوا كويس أوي في كل الشروط والأصوات، يعني أنا بنت نقيب الموسيقيين الله يرحمه، لما روحت علشان أقدم اختبروني، ومقالوش نديها الكارنيه علشان دي بنت حسن أبو السعود، لأ عملولي لجنة وكانت مرعبة وقعدوا يسألوني، هما بيعرفوا يصنفوا كويس مين اللي ينفع يكمل، ومين لأ، اختيارتهم صائبة في الحاجات دي أوي.
