موقف إنساني من وليد سليمان تجاه مشجع للأهلي من ذوي الاحتياجات الخاصة | صورة
أهدى وليد سليمان نجم فريق الأهلي، في لفتة طيبة، كرسي متحرك، لـ أحد مشجعي القلعة الحمراء، من ذوي القدرات الخاصة.
وكشف إسلام محمد مشجع الأهلي، عبر خاصية ستوري على تطبيق واتس اب، تفاصيل إهداء وليد سليمان كرسي متحرك له، قائلًا: الناس اللي كانت عايزة تعرف الحاوي كان بيتكلم معايا في إيه في ماتش المقاصة.. كابتن وليد سليمان كان بيسألني الكرسي بتاعي فين قولتله في تصليحات بسيطة، وإن شاء الله هيبقى جاهز.. قالي خير إن شاء الله.
وتابع مشجع الأهلي: في ماتش المقاولون وفي عز الشوط الثاني، وعز ما الواحد هيولع من اللي في الملعب.. جه جنبي وقالي يا إسلام الكرسي هيجيلك كمان يومين، والله العظيم حتى ما بصيتله.. قولتله ماشي يا كابتن.. طبطب على كتفي ومشي.
واستكمل حديثه: النهاردة قصدي امبارح اللي هوا يوم الاثنين.. صحيت على التليفون بيرن، لقیت محمود عامل الملعب بيقولي كابتن وليد سليمان عايزك، قومت معرفش أصلا قاعد على كرسي إزاي ولبست إزاي.. روحت لقيت كابتن ولید جايبلي الكرسي، وقالي عشان تتحرك وتلف وراء الفريق زي ما أنت متعود.. شكرا كابتن ولید.. شكرا یا حاوي.
كان الأهلي قد سقط في فخ التعادل أمام نظيره المقاولون العرب، سلبيًا دون أي أهداف، في اللقاء الذي أقيم السبت الماضي، على استاد عثمان أحمد عثمان، ليصعب آماله في المنافسة على لقب الدوري الممتاز.
