عملولي غسيل مخ عشان أدفع وبعتولي تهديدات بعد البوست.. فتاة تكشف تفاصيل تعرضها للنصب من شركة منتجات تجميل
كشفت شمس عصام، الفتاة التي تعرضت للنصب من إحدى شركات العناية بالبشرة، تفاصيل تعرضها للنصب من الشركة.
الفتاة تكشف تفاصيل تعرضها للنصب
وقالت شمس في تصريحات خاصة لـ القاهرة 24: لما عرفت إنهم نصابين، جبتها لهم بطريقة غير مباشرة إني عايزة فلوسي، فقلت لهم: إنتوا كنتوا مبلغيني إني معايا 30 يوم استرد فيها فلوسي اللي هما 6 آلاف جنيه، قالوا لا طبعا مفيش استرداد فلوس.
وأضافت شمس: قلت للمسئول إني حصلت لي مشاكل في البيت ووالدتي طلبت الفلوس، قالي هاتي حاجة قسط وبيعها وسددي فلوس والدتك، فرفضت، ومرضيش يديني الفلوس وقالي إني عضو في الشركة ووقت ما أحب أرجع الباب مفتوح، وغير كده ماليش فلوس.
وتابعت: في البداية عملوا لي غسيل مخ عشان أوافق، وقعدوا يقولوا لي إحنا شركة مختلفة، وده أوفر ولازم تدفعي النهاردة، حتى ادفعي في فودافون كاش، لأن من بكرة الباقة هتصل إلى 12 ألف جنيه، وديه فرصة مش هتتعوض، ونزلت دفعت في فودافون كاش من غير أي إثبات خالص.
وأكملت: المنتج مش من الهند زي ما قالوا، وكمان إكسباير، وهما بيبعوه على إنهم أورجينال، والأسعار غالية جدا محدش رضي يشتري مني، كمان المنتج مش متوفر في أي مكان ولا أي صيدلية، كل التعامل من خلالهم.
تهديدات لحذف المنشور
واستطردت حديثها قائلة: في ناس صحابي حصل معاهم نفس الحوار بس خافوا يتكلموا، والبنت اللي روحت الشركة من خلالها بعتت لي إمبارح تهديدات إني أمسح البوست وإلا هخسر.
واختتمت حديثها مع القاهرة 24، قائلة: حقي ربنا هيجيبه، بس أنا عايزة كل الناس تعرف حقيقة الشركة، لأن في أقل من أسبوع جالي 5 من صحابي يسألوني عليها، فقلت أعرف الناس باللي حصل معايا.
واتهمت شمس عصام، إحدى شركات التسويق باستقطاب الطلاب وحديثي التخرج، للقيام بعمليات نصب كبرى عليهم، حيث زعمت في منشور لها، أن الشركة تطلب أموالا من الشخص المنضم إليها، من أجل تكوين فريق لتسويق المنتج، مدعية أن المنتج غير متوفر من الأساس، وأن عمل الشركة نصب.
