الجمعة 29 مارس 2024
More forecasts: Wetter 4 wochen
رئيس التحرير
محمود المملوك
أخبار
حوادث
رياضة
فن
سياسة
اقتصاد
محافظات

النرجسية.. نقاط القوة والضعف وكيف نستجيب بذكاء لأساليبهم الأكثر تأثيرًا

الأحد 25/سبتمبر/2022 - 06:38 م

مهم جدًا نعرف إن فيه فرق بين اضطراب الشخصية النرجسية والنرجسي، بشكل عام مش كل شخص نرجسي بالضرورة يكون عنده اضطراب الشخصية النرجسية، فالنرجسية نطاق جواه درجات أقصاها تطرفا بيتم تصنيفها كاضطراب الشخصية النرجسية، وجوا النطاق ده فيه سمات خاصة بيها على حسب قوة السمات دي وتدخل أذى الغير فيها هنا بيكمن الفرق بين النرجسي والمصاب باضطراب الشخصية النرجسية.

أما بقا اضطراب الشخصية النرجسية واسمها العلمي NPD (Narcissistic personality disorder)، فده مرض عقلي محتاج مساعدة محترفة، والحقيقة إن المختصين مقدروش يفهموا بشكل كامل سبب النوع ده من الاضطراب ولكن ارجعوه لعدد من العوامل أهمها الجينات، التنشئة أو التريبة، المعاناة في الطفولة، أو الصدمات المختلفة في مراحل عمرية معينة.

الأشخاص المصابة بالنوع ده من الاضطراب في الغالب عندهم مستويات عالية من الثقة بالنفس تصل إلى الغرور، بيحبو يكونوا مركز الاهتمام وتحت الأضواء دائما، بيركزوا في هزارهم على التنمر بشكل الكبير أو السخرية من الآخرين، بيحتكروا المحادثات والاجتماعات، بيعرفوا يستفيدوا إزاي من كل إلي حواليهم وإزاي يوظفوهم لخدمة أهدافهم، وغير متقبلين للنقد من الأساس، نسبة كبيرة منهم بيكون عندهم كاريزما وحضور عالي وبيعرفوا يخدعوا إلي أدامهم في البداية، بس مع الوقت تبدأ الحقيقة تبان، الثقة في النفس بنلاقيها غرور، الذكاء الاجتماعي بيطلع استغلال، حب الظهور والاهتمام بيطلع أنانية، والحقيقة إن التعامل مع الشخصية دي بياخد طاقة عالية جدًا منك وبيهلك روحك مع الوقت ولازم تعرف إزاي تتعامل مع النوع ده من الشخصيات عشان تحافظ على سلامك النفسي والعقلي.

في المقال ده هنتعرف على أهم الأساليب إلي بيلجأ إليها الشخص النرجسي وإزاي نتعامل معاها بشكل سليم، وهناقش ده على عدد من المقالات الجاية بالتفصيل،  قبل ما نبدأ لازم تعرف إن بداية إدراكك إنك بتتعامل مع شخصية نرجسية أنت كده على الطريق الصح وكمان أوعى تاخد أي حاجة من أفعاله أو كلامه بشكل شخصي عشان ميأثرش على ثقتك بنفسك وسلامتك زي ما هنشوف دلوقتي.

أشهر وأكتر أسلوب بتلجأ ليه الشخصية النرجسية وإلي من السهل شخصيات كتير تقع ضحية ليه هو التلاعب العقلي Gaslighting، والتلاعب النفسي والعقلي والعملية دي الخبراء بيسموها Gas lighting وهي من أشهر  الأساليب إلي بتستخدمها الشخصية النرجسية ومعناها ببساطة إن الشخص النرجسي بيستخدم أساليب نفسية بتلاعب عشان يشكك في قدرة الشخص التاني وسلامته العقلية وأشهر مثال لده هو  إنكار موقف أو كلام معين قاله، التشكيك في ذاكرتك، في الأول ممكن متقدرش تحدد ده بسهولة ولكن مع الوقت هتلاقي نفسك بتركز في التفاصيل، للتعامل مع النقطة دي هيكون دفاعك ديما في أدلة واستشهاد بمواقف مماثلة، احذر إن أسلوبه ده يشكك في نفسك بل على عكس ديما تذكر إنك فاهم الأسلوب ده وإنك متأكد من كلامك زي مثلا "بعد إذنك راجع نفسك وذاكرتك تاني لأني فاكر كويس جدا إيه حصل" وإنهي النقاش، الهدوء ثم الهدوء ثم الهدوء والنقاش بطريقة لطيفة هيخليك تكسب الجولة من غير ما تحفز الشخص النرجسي إنه يعاند معاك.

تاني أشهر أسلوب هو  تضخيم رد فعلك والتصغير من الفعل ذاته، الشخص النرجسي كمان هيميل إنه يضخم من رد فعلك أو أثره مقابل التقليل من أثر فعله هو  زي اتهامك بالحساسية الشديدة لما تزعل منهم أو يقولك "ده هزار مش المفروض إنك تضايق" مع إنه مكنش بيقول الكلام ده بهزار والطريقة الأمثل للتصرف في الحالة دي مبنى على نقطتين مترابطتين أولا إنك تكون مدرك وفاهم هو بيعمل إيه، تاني نقطة هي إنك تحط حدود للتعامل معاه setting boundaries  ودي من أنجح الأساليب للتعامل مع الشخصية النرجسية وضح حدودك معاه بهدوء "أنا فاهم إنت بتعمل إيه، لو الحركة دي اتعملت تاني / اتكلمت كدة تاني أنا مش هكمل نقاش معاك.

الصمت silent treatment 
بتلجأ الشخصية النرجسية لعقاب شريكها بالمعاملة الصامتة، وبيلجأ للصمت المقصود وتجاهل شريكه بهدف إثارة غضبه، ورد فعلك هنا بيكون على مراحل في الأول لازم توضح للشخصية النرجسية إنك رافض الطريقة دي وإنها بتضايقك ومش هتحل المشكلة بالعكس، حاول تتفهم السبب الحقيقي إلي مضايقه، استمرت الطريقة دي أو بدا استخدامها بشكل متكرر لازم تحافظ على هدوئك ده هيحسسه إن أسلوبه إنه فشل في هدفه، أخر مرحلة إنك تبادله نفس الأسلوب، على أد ما الشخص النرجسي بيلجأ للمعاملة الصامتة على أد ما بيكره إنه يتعامل بيها.

في النهاية التعامل مع الشخصيات النرجسية مرهقة وصعبة ولكن باتباع الأساليب الصحيحة هتقدر تفهم الشخصية دي كويس وتتفهم مخاوفها ودوافعها، وتتعامل معاها بشكل يحافظ على سلامك النفسي والعقلي، وده لإن إنهاء العلاقات مع الشخصيات دي وتجنبها حل مناسب جدا أحيانا ولكن في أوقات تانية بيكون الشخص ده في دايرة الأهل والأصدقاء وهنا بيكون صعب ومؤلم إنهاء العلاقات مع أشخاص مهمة لينا في الدواير دي، كمان إن الشخصيات النرجسية ليها مميزات فهي شخصيات ساحرة وجذابة بطبعها وتقدر تديك ثقة بنفسك في كثير من الأحيان ونفحات الحب عندها قوية جدا وصعب مقاومتها كمان بتقدر تساعدك في المواقف الصعبة نتيجة شخصيتها القوية والناجحة.

الاختيار ليك ولكن مع الدرجات الأصعب والأسوء من الشخصيات النرجسية فإنهاء العلاقات السامة دي بمثابة خروجك الآمن للحفاظ على قوتك العقلية والنفسية.

دمتم بخير..

 

تابع مواقعنا